Но, освен за националните интереси, на средбата треба да се разговара и што ќе се прави по неуспешното спроведување на измените во Уставот, велат од опозициската партија откако премиерот Димитар Ковачевски најави дека ќе го покани Христијан Мицкоски на средба
Претседателот на ВМРО-ДПМНЕ, Христијан Мицкоски, е подготвен во кое било време да разговара за националните и државни интереси на Македонија – велат од опозицската ВМРО-ДПМНЕ во врска со изјавата на премиерот Димитар Ковачевски во која тој пред медиумите кажа дека ќе го покани опозицискиот лидер на средба.
Но, освен за националните интереси, велат од ВМРО-ДПМНЕ, на средбата треба да се разговара и што ќе се прави по неуспешното спроведување на измените во Уставот.
„Доколку постои желба за национално единство и слушање на гласот на мнозинството, прифаќаме лидерска средба на која, меѓу другото, треба да се види што ќе се прави во периодот по неуспехот на уставните измени и иднината на граѓаните која треба да се обезбеди“,
се наведува во соопштението на опозициската партија.
Најавата за потенцијална средба со лидерот на ВМРО-ДПМНЕ, премиерот Димитар Ковачевски ја соопшти денеска одговарајќи на новинарски прашања по посетата на скопскиот Клинички центар.
Премиерот кажа дека за десетина дена планира да го покани претседателот на опозициската партија Христијан Мицкоски на средба на која, како што рече, би се разговарало за две теми.
Првата тема – рече Ковачевски – ќе биде во врска со носењето на одлуките кои се потребни за интеграција на Северна Македонија во Европската Унија. Во фокус на втората тема, пак, како што кажа, би било усогласувањето на ставовите во врска со односите со сите соседи на државава.