Во вечерашното гостување во емисијата „Само интервју“ на Канал 5, претседателот на ВМРО-ДПМНЕ изјави оти партиите треба да се договорат за бришење на техничката влада не само за претстојните, туку за сите наредни избори. Оцени дека во техничката влада има повеќе опструкции отколку нешто коешто може да додаде вредност на процесот
Лидерот на опозициската ВМРО-ДПМНЕ, Христијан Мицкоски, вели дека повеќе не гледа потреба од постоењето на техничка влада на 100 дена пред одржување на парламентарни избори.
Во вечерашното гостување во емисијата „Само интервју“ на Канал 5, Мицкоски изјави оти партиите треба да се договорат за бришење на техничката влада не само за претстојните, туку за сите наредни избори. Оцени дека во техничката влада има повеќе опструкции отколку нешто коешто може да додаде вредност на процесот.
„Верувајте јас ова го говорам најискрено и ценам дека треба заедно со политичките партии од власта и со останатите парламентарни партии да интервенираме во Изборниот законик и да го избришеме оној дел од техничката влада, и практично од овој момент па натаму да имаме влада со политички легитимитет“,
изјави Мицкоски.
Говорејќи во оваа насока, лидерот ВМРО-ДПМНЕ рече дека за него како граѓанин и како политичар би било понижувачки доколку ДУИ номинира премиер во техничката влада со оглед на, како што вели, сите криминални и коруптивни скандали со во чиј центар е токму Демократската унија за интеграција.
„Не гледам каков квалитет тој премиер може да донесе и каква додадена вредност. Второ, ценам дека земја која што претендира да биде дел од ЕУ мора да покаже и малку одговорност и зрелост. Ние треба да покажеме дека сме зрели“,
додаде Мицкоски.
Во однос на претстојните избори, Мицкоски вели дека ВМРО-ДПМНЕ ќе се бори да дојде што е можно поблиску или да освои мнозинство од 61 пратеник во парламентот. Повикувајќи се на мерењата на јавното мислење, Мицкоски прогнозира и победа на претседателскиот кандидат кој ќе го предложи неговата партија.
Прашан во врска со датумот на изборите, лидерот на опозицијата кажа дека тоа е предмет на консензус и дека конечно треба да се финализира, но вели ја препушта иницијативата на премиерот Димитар Ковачевски, само за, како што вели, да може официјално да се затвори ова прашање.