Ако денеска заврши расправата во Комисијата, тој повика да не се чека за пленарна седница до 18 август туку таа да се закаже утре, па ако власта нема двотретинско мнозинство да се распушти парламентот и да се оди на избори
Лидерот на ВМРО-ДПМНЕ, Христијан Мицкоски, очекува наместо предвидените максимални 10 дена, расправата за уставни измени во Комисијата за уставни прашање да заврши уште денеска. Неговите очекувања се дека од 17 члена на оваа комисија, 10 ќе гласаат „за“, а седум „против“ предлогот за уставни измени да се најде на пленарна седница.
„Не очекувам дискусијата да трае 10-ина дена, имам некое чувство дека денеска ќе заврши во Уставната комисија. Таму се 17 пратеници, од кои на ВМРО-ДПМНЕ и коалицијата се седум, а за да точката потоа се најде на дневен ред на пленарна седница потребно е да има мнозинство во оваа комисија. Очекувам резултатот да биде 10 ’за‘, седум ’против‘“,
изјави денеска Мицкоски од Битола.
Откако иницијативата за уставни измени ќе го помине филтерот во Комисијата, таа ќе треба да се најде на пленарна седница која инаку е закажана за 18 август. Тогаш, на власта ќе и треба двотретинско мнозинство, односно 80 гласа. Мицкоски е убеден дека тоа нема да се случи бидејќи ниту еден пратеник од неговата партија и коалицијата да гласа „за“.
„Верувајте дека 44 пратеници на ВМРО-ДПМНЕ и коалицијата се јасни и прецизни во својот став. Вчера имавме координација без ниту еден збор никој да каже, во просторијата јасно беше дека зборуваме сите на глас, а тоа е дека уставни измени под бугарски диктат нема да има“,
рече Мицкоски.
Ако денеска заврши расправата во Комисијата, тој повика да не се чека за пленарна до 18 август, туку таа да се закаже за утре, па ако власта нема двотретинско мнозинство да се распушти парламентот и да се оди на избори.
„Очекуваме Европејците, како што се нарекуваат себеси овие милионериве, бидејќи цело време тврдат дека имаат 80, веднаш, да не ја развлекуваат седницата и да ја стават на дневен ред. Еве јас ги повикувам веднаш, ако заврши уставната комисија нема потреба да чекаме, уште утре нека закажат собраниска седница и да видиме дали имаат 80 или немаат. Ако не закажат, тогаш јасно е дека немаат. Ако немаат јас не гледам друга политика која оваа влада би ја оправдала во нејзиното постоење. Треба час поскоро да го распуштиме парламентот и да одиме на предвремени избори“,
рече лидерот на ВМРО-ДПМНЕ.
Комисијата за уставни прашања денеска претпладне ја почна седницата и го усвои дневниот ред со 10 гласа „за“ и седум „против“.
Прв на неа зборуваше премиерот Димитар Ковачевски, кој како претставник на Владата ја образложи иницијативата за уставни измени.
Максималниот број денови за расправа во Комисијата е 10. Ако се дебатира 10 дена, очекувањата се комисиската расправа да заврши помеѓу 7 и 9 август, ако се има предвид дека 2 август е неработен ден, а 27 јули е закажана седница за пратенички прашања.