Мицкоски најави разрешување на заменик-директорот на „Македонија пат“ ако се утврди дека тој ја застрелал мечката

Таквите девијантни однесувања, како што рече премиерот, ако се потврдат, нема да ги оправда ниту да ги амнестира

Ако се потврди дека заменик-директорот на „Македонија пат“, Сашо Дранго, ја застрелал мечката со која се фотографираше, премиерот Христијан Мицкоски најави дека ќе бара одговорност и негово разрешување од функцијата. Таквите девијантни однесувања, како што рече, ако се потврдат, нема да ги оправда ниту амнестира.

„Доколку се потврдат овие тврдења, ќе барам одговорност и ќе биде под итно разрешен. апсолитно Таквите девијантни однесувања доколку се потврдат, јас ниту ги оправдувам, ниту имам намера да ги амнестирам“,

изјави премиерот во одговор на новинарско прашање по божиќната литургија во Соборниот храм во Скопје.

Здружението за заштита на животните „Анима мунди“ пред неколку дена објави дека заменик-директорот на „Македонија пат“ и претседател на Унијата на ветерани на ВМРО-ДПМНЕ во Демир Хисар, Сашо Дранго, се фотографирал со мечка којашто ја застрелал во декември 2024 година и побараа тој кривично да одговара.

• (ФОТО) „Анима мунди“: Заменик-директорот на „Македонија пат“ убил мечка и гордо позирал со неа, ќе поднесеме кривична пријава

Дранго ги негираше тврдењата на Здружението, велејќи дека тој не ја застрелал мечката туку дека таа била жртва на сообраќајна несреќа, а оти тој и вработените во претпријатието ја тргнале од коловозот, по што тој се фотографирал со неа.

• Во билтенот на МВР нема податок дека во сообраќајка во декември е усмртена мечка, како што тврди Дранго – велат од „Анима мунди“

Основното јавно обвинителство Битола најави дека ќе отвори предмет за случајот.