Поранешниот собраниски спикер од редовите на ВМРО-ДПМНЕ, Трајко Вељаноски, денеска преку писмено соопштение реагираше околу седницата на која треба да се гласаат уставните измени, а која беше прекината откако се изгласа дневниот ред и пријавените пратениците за збор ги изнесоа своите аргументи
Лидерот на ВМРО-ДПМНЕ, Христијан Мицкоски, денеска имал редовна координација со пратеничката група на партијата на која бил повторен ставот дека нема да прифатат уставни измени под бугарски диктат. Мицкоски и пратениците на ВМРО-ДПМНЕ уште еднаш повикаа да не се одолговлекува процедурата за измените на Уставот.
„Денес имав редовна координација со пратеничката група на ВМРО-ДПМНЕ и коалицијата. Нема уставни измени под бугарски диктат. Остро сме против законските решенија кои предвидуваат зголемување на давачките, повисоки даночни опфати кои директно влијаат врз зголемување на сиромаштијата. Бараме да не се одолговлекува процедурата и да се злоупотребува позицијата за да се одолговлекува седницата за уставни измени Ќе се почитува волјата на граѓаните и нивниот интерес да не се потклекне на барањата за правење на компромиси на штета на државните интереси“,
објави по средбата Мицкоски на Фејсбук.
Поранешниот собраниски спикер од редовите на ВМРО-ДПМНЕ, Трајко Вељаноски, денеска преку писмено соопштение реагираше околу седницата на која треба да се гласаат уставните измени, а која беше прекината откако се изгласа дневниот ред и пријавените пратениците за збор ги изнесоа своите аргументи.
Вељаноски, во писменото соопштение, цитирајќи членови од Деловникот, посочи дека гласањето на уставните измени мора да се случи најдоцна денеска.
„Согласно член 196 став 1 од Деловникот за работа на Собранието на Република Македонија претресот за измена на Устав трае 10 работни денови и по завршување на претресот се пристапува кон гласање. Денес, на 1 септември завршуваат десетте работни денови откако беше отворена постапката и завршена расправата за измена на Уставот на собраниската седница број 123, закажана и одржана на 18 август. Гласањето мора да се случи најдоцна денес. Секое спротивно постапување не е во согласност со Деловникот“,
наведува Вељаноски во соопштението.
Од кабинетот на актуелниот претседател на Собранието Талат Џафери посочија дека спикерот ставот околу таа седница го изнел на 21 август.
Тогаш Џафери на прес-конференција ја објасни процедурата предвидена со Деловникот на Собранието.
Џафери рече дека постапил врз основа на членот 81 од Деловникот, но кажа и дека врз основа на политичка проценка е донесена одлуката седницата да биде прекината по последниот пратеникот што дискутираше на расправата.