Премиерот упати критика кон опозицијата дека не покажува доволна самокритичност и порача дека доколку сака да биде кредибилна алтернатива, треба јавно да го повика поранешниот директор на ЕСМ, Васко Ковачевски, да се врати во земјата и да се соочи со правдата
Немам информации, но имам чувство дека високи функционери од претходната влада на Социјалдемократскиот сојуз (СДСМ), како поранешни премиери и нивни блиски од семејствата, ќе бидат опфатени со одредени прогони. Ова денеска го рече премиерот Христијан Мицкоски на промоцијата на новиот возен парк на „Пошта“ како одговор на новинарско прашање за ставовите на опозициската СДСМ во врска со одговорноста на поранешниот премиер Никола Груевски, кој во ноември 2018 година избега за Будимпешта, каде што доби политички азил.
Мицкоски посочи дека во државата мора да постојат еднакви услови за сите, без разлика дали станува збор за сегашни или поранешни високи функционери.
„И тука не треба да има никаква дилема, барем додека е оваа влада и додека сум јас премиер“,
рече тој.
Потоа упати критика кон опозицијата дека не покажува доволна самокритичност и порача дека доколку сака да биде кредибилна алтернатива, треба јавно да го повика поранешниот директор на ЕСМ, Васко Ковачевски, да се врати во земјата и да се соочи со правдата.
„Она што загрижува е фактот дека од опозицијата сè уште не ја научија лекцијата и сè уште живеат во оној свој паралелен свет, па никако не можете да слушнете, да речеме, да го повикаат Васко Ковачевски да се врати во земјата и да се соочи со правдата. И се чудам зошто на нивните прес-конференции, доколку сакаат и планираат да бидат реална алтернатива на оваа влада, не можете да го сретнете името на Васко Ковачевски, и да го повикаат исто така да се врати и да се соочи со правдата“,
вели Мицкоски.
Очекува опозицијата да покаже ист степен на критичност и во случаи кога поранешни функционери од нивните редови би биле опфатени во одредени прогони, предмет на истраги или судски постапки, односно и тогаш да излезат на прес-конференции и да ги повикаат на одговорност.
„Очекувам од истата оваа опозиција да се однесува вака критички, како што сега се однесува, кога имам чувство дека набргу високи функционери од претходната влада на СДСМ, поранешни премиери, претседатели на влада, нивни блиски од семејствата итн, ќе бидат опфатени во одредени прогони. Имам чувство, не велам дека има информација, имам чувство. Очекувам дека и тогаш кога тоа ќе се случи, исто така ќе имаат вакви прес-конференции и тогаш нема да велат дека тоа е политички прогон, туку ќе ги повикаат да одговараат пред органите, односно да ја докажуваат својата невиност“,
рече премиерот.
Мицкоски вчера ја коментираше победата на Петар Маѓар, лидерот на партијата Тиса, на парламентарни избори во Унгарија одржани во неделата, како и најавите за евентуална екстрадиција на поранешниот премиер Никола Груевски, посочувајќи дека специфичните политики поврзани со ова прашање се одлука на унгарската влада.
Посочи дека екстрадиција за Груевски е побарана уште во 2018, а е одбиена во 2019 година од страна на унгарските власти.
За дополнителни информации, премиерот ги упати новинарите да се обратат до Министерството за правда.
На новинарско прашање дали има очекувања дека Груевски ќе се врати во земјава, Мицкоски рече оти нема такво нешто и додаде дека ако поранешниот премиер се појави во земјава ќе биде упатен на извршување затворска казна.