Жалам што наместо да зборуваме за вештачка интелигенција, за поквалитетно образование и поконкурентен здравствен систем, ние денеска зборуваме за исполнување на елементарното човеково право, а тоа е правото на самоопределување, порача лидерот на ВМРО-ДПМНЕ, Христијан Мицкоски, на денешниот протест пред Владата.
„Во минатото честопати повторувавме дека не треба да се потпишуваат договори на егзибиционистички начин, чија содржина наместо да биде решение ќе претставува проблем. Тоа го зборувавме и кога се потпишуваше Договорот за пријателство со соседна Бугарија. ВМРО-ДПМНЕ и другите влади во минатото преговарале да постигнат некој ваков договор, но буквално ниту една влада не потпиша договор со таква содржина бидејќи вие ако во договорот ставите нешто со што се оспорува потеклото и коренот на вашиот јазик, со кој се оспоруваат историските факти и тоа биде критериум за понатамошно ваше полноправно членство во ЕУ, тоа не е договор и тоа никогаш нема да претставува договор кој ќе ја донесе Македонија во рамки на обединета Европа и да биде дел од европското семејство, туку напротив, тоа претставува алатка на тие кои се внатре континуирано да вршат терор врз македонскиот народ и македонската нација и македонската држава“,
рече Мицкоски.
Тој го нарече премиерот Зоран Заев политички аматер бидејќи, како што вели, потпишал договор во кој историјата ќе биде критериум за напредок на државата во процесот за полноправно членство во рамки на ЕУ.
Лидерот на ВМРО-ДПМНЕ не одговори конкретно на новинарското прашање за тоа со какви информации располага партијата кога вели дека власта викендов водела тајни преговори со Софија. Мицкоски рече дека никаков нов договор, патоказ или анекс, нема да го почитуваат, ако се преговара за македонскиот идентитет, јазик и историја.
„Информации може да каже тој што преговара. Ние може да кажеме дека ниту еден патоказ, ниту еден анекс или нов договор идната влада предводена од ВМРО-ДПМНЕ нема да го почитува ако биде начнат македонскиот идентитет. Доколку некој се дрзне да чепне во ова и да се откаже од македонското малцинство кај нашиот источен сосед, идната влада на ВМРО-ДПМНЕ нема намера да го почитува“,
рече Мицкоски.
Лидерот на ВМРО-ДПМНЕ за утре најави нов протест пред платото на Владата и пред зградата на Министерството за надворешни работи.