Лидерот на ВМРО-ДПМНЕ оцени во Прилеп дека земјава заслужува веднаш да почне безусловни преговори со ЕУ, а, како што рече, ако власта правеше вистински реформи ќе имавме уште повеќе аргументи за тоа
Лидерот на ВМРО-ДПМНЕ, Христијан Мицкоски, го предупредува премиерот Зоран Заев да не потпишува какви било нови договори со Бугарија, зашто, како што рече, новата влада што тој би ја формирал нема да ги прифати и, ако е потребно, еднострано ќе ги раскине.
„Земјава треба да почне безусловни преговори за влез во ЕУ уште во јуни, бидејќи тоа не е нешто што Република Македонија го бара како милостина, туку таа тоа го заслужува“,
изјави тој денеска во Прилеп зборувајќи за односите со Бугарија и за средбата Радев-Пендаровски.
Мицкоски додаде дека земјава направила најголем број отстапки и доживеала незаслужени понижувања во однос на националниот идентитет и токму поради тоа, како што оцени, Европската Унија треба да има предвид дека нашата држава заслужува членство во ЕУ ден поскоро. Ваквиот став на ВМРО-ДПМНЕ, како што рече, треба да го знаат сите во администрацијата во Брисел,, како и Европскиот совет.
„Доколку Владата изминатите неколку години работеше на вистински реформи во врска со правосудството, здравството, образованието, економијата, тогаш Република Македонија ќе имаше уште поголем број аргументи на своја страна во преговорите со ЕУ. Поради тоа што Владата предводена од Зоран Заев и СДСМ ја урниса државата и ги клекна на колена образованието, здравството, економијата и целото општество, сега притисокот е директно врз нив и од нив се очекува да престанат со националната распродажба и расфрлањето на историјата“,
вели Мицкоски.
Мицкоски му порача на премиерот Зоран Заев да не си поигрува со идентитетот и, како што рече, да не се обидува повторно да потпишува договори и преговори во кои во каква било реченица ќе се негира македонскиот идентитет и постоењето на македонската историја. Тогаш, како што рече опозицискиот лидер, капитулацијата ќе биде дефинитивно потпишана, а оттука враќање нема.
„Владата што ќе биде предводена од ВМРО-ДПМНЕ нема намера да почитува вакви договори. Тоа нека го знаат и бугарските власти. Ако е потребно, Владата на Република Македонија предводена од ВМРО-ДПМНЕ еднострано ќе го напушти таквиот договор, без разлика на политичките реперкусии врз мене лично или врз ВМРО-ДПМНЕ. Ние нема да прифатиме отстапување на никакви дополнителни национални концесии, ВМРО-ДПМНЕ е децидна во однос на ваквиот став“,
заврши Мицкоски.