Пендаровски, пак, вчера излезе со став дека можеби Северна Македонија и Бугарија може да се договорат во работата на заедничката историска комисија да се вмеша трета страна – експерти од некоја друга европска држава. Таков предлог, како што рече шефот на државата, има во португалскиот нон-пејпер, кој неодамна до Скопје и Софија го достави министерот за надворешни работи на Португалија, Аугусто Сантош Силва
Немаме потреба од посредници, никој од нас подобро не ја знае нашата историја. Решението на проблемите зависи од нас, од конструктивниот дијалог врз историски документи и извори на кои ќе работи заедничката комисија, изјави денеска во Рим бугарскиот претседател Румен Радев во врска со предлогот европските историчари да се вклучат во бугарско-македонската историска комисија.
Радев рече дека овој негов став му го кажал повеќепати на својот македонски колега Стево Пендаровски.
„Комисијата ќе се занимава со историјата, но најважно е ние на високо политичко ниво да ги преземеме потребните чекори. Овие чекори не поминуваат низ другите европски метрополи и оттаму да се врши притисок врз Бугарија. Вистинскиот чекор е еден – во Софија. Тогаш ќе се решат сите проблеми. Ние мора да бараме одржливо и неповратно решение“,
изјави Радев за бугарските новинари кои ја следат неговата посета на Рим.
Претседателот на Бугарија се наоѓа во Рим на заедничко патување со Пендаровски по повод одбележувањето на 24 Мај – Денот на сесловенските просветители Кирил и Методиј.
Токму од Рим вчера Пендаровски, пак, излезе со став дека можеби Северна Македонија и Бугарија може да се договорат во работата на заедничката историска комисија да се вмеша трета страна – експерти од некоја друга европска држава. Таков предлог, како што рече шефот на државата, има во португалскиот нон-пејпер, кој неодамна до Скопје и Софија го достави министерот за надворешни работи на Португалија, Аугусто Сантош Силва.
„Во португалскиот предлог постои друг дета1 кој се однесува на истата работа – вмешување од страна. Вели ’има европски држави кои би биле заинтересирани да контрибуираат во комисијата составена од историчари‘. Не како формални членови, како луѓе кои би биле тука и можеби би давале совети за методологијата за работа. Треба двете земји да се согласат за да се приклучат такви луѓе во комисијата“,
рече Пендаровски.
Исто така, тој потсети дека во португалскиот нон-пејпер се предлага да постои патоказ и неговото исполнување да биде надгледувано во рамки на Советот за стабилизација и асоцијација, а не во рамки на Европската комисија (ЕК) и порача дека тој нема проблем ниту со тоа каде да се мониторира тоа. Многу поважно за него е што ќе пишува во тој процес.
„Знаете кој е мојот став, јас немам проблем со посебни поглавја, ама ме интересира што пишува во нив, немам проблем со патоказ, но ме интересира што пишува внатре. Може да имате најбенигно име, ама да имате тешка содржина која е лоша за вашата држава. Да не се држиме за формата, дали ќе биде во рамки на Советот или во рамки на ЕК, дали ќе се вика вака или поинаку, многу ми е важно дали ќе бидат сочувани виталните национални интереси“,
рече Пендаровски.