Евентуалното „зелено светло“, кое министрите би го дале за кандидатски статус на БиХ, потоа треба да го поддржат и лидерите на дваесет и седумте членки на Самитот на ЕУ на 15 декември. Следниот чекор, кој исто така бара едногласност на дваесет и седумте членки на ЕУ, е отворањето на формалните пристапни преговори, за што е потребно време бидејќи земјите кандидатки мора да вклучат голем број европски законодавни акти во своето национално право
Министрите за европски прашања на 27-те земји од Европската Унија на денешниот состанок во Брисел треба да одлучат за доделување кандидатски статус на Босна и Херцеговина, што би било прва фаза од пристапниот процес на оваа земја.
Повикувајќи се на документ во кој имала увид редакцијата на регионалниот сервис на Радио Слободна Европа (РСЕ), БиХ најверојатно денеска ќе добие кандидатски статус за полноправно членство во Унијата.
Овој документ ќе се најде како точка за усвојување пред Советот за општи работи на ЕУ, од кој дел се министрите надлежни за европски прашања во земјите членки на ЕУ.
Евентуалното зелено светло кое министрите би го дале за кандидатски статус на БиХ, потоа треба да го поддржат и лидерите на дваесет и седумте членки на самитот на ЕУ на 15 декември.
Следниот чекор, кој исто така бара едногласност на дваесет и седумте членки на ЕУ, е отворањето на формалните пристапни преговори, за што е потребно време бидејќи земјите кандидатки мора да вклучат голем број европски законодавни акти во своето национално право.
Претходно, во октомври годинава, Европската комисија препорача земјите членки да ѝ дадат кандидатски статус на БиХ, земјата со три и пол милиони жители, зафатена од сиромаштија и политичка нестабилност.
Освен кандидатскиот статус за БиХ, тема на денешниот состанок во Брисел треба да биде и генерално проширувањето на ЕУ кон Западен Балкан, како и ситуацијата на северот на Косово.