Уставниот суд со решение потврди дека и покрај тоа што во Законот за локалната самоуправа стои „Република Македонија“, при примената на прописите и другите акти на државните органи се користи уставното име на државата согласно Уставниот закон за спроведување на амандманите на Уставот, велат од Министерството
Уставниот суд го потврди мислењето на Министерството за локална самоуправа доставено до општините дека свечените изјави на конститутивната седница, членовите на советите на општините ги даваат и ги потпишуваат со уставното име на државата – Република Северна Македонија, порачаа денеска од ресорното министерство.
Пораката од Министерството за локална самоуправа следува откако пред Уставниот суд беше поднесена иницијатива за оценување на уставноста на деловите од Законот за локалната самоуправа каде што стојат зборовите „Република Македонија“, по што судот потврди дека треба да се почитува Уставот.
Со ова, велат оттаму, и формално се потврди дека одбивањето на некои членови на општинските совети свечената изјава да ја дадат и да ја потпишат со уставното име на државата е спротивно на Уставот и на Законот за локалната самоуправа.
„Со решение, Уставниот суд на Република Северна Македонија ја отфрли иницијативата за поведување на постапка за оценување на уставноста на одредби од Законот за локалната самоуправа коишто се однесуваат на името на државата, со што и формално е потврдено дека и покрај тоа што во Законот за локалната самоуправа стои ’Република Македонија‘, затоа што Законот е донесен во 2002 година, согласно член 2 став 1 од Уставниот закон за спроведување на амандманите на Уставот, при примената на прописите и другите акти на државните органи се користи уставното име на државата“,
велат од Министерството.
Случаи каде советници од опозициските партии ВМРО-ДПМНЕ и Левица не потпишуваа свечени изјави со новото уставно име имаше во неколку општини во државата по локалните избори во октомври лани, како на пример Штип, Аеродром, Кисела Вода.
*Поврзани вести:
- МНР: Општините и советниците доследно да го применуваат уставното име на државата
- Милевски бара да се почитува Уставот и во свечените изјави на новите советници да стои уставното име
- Советниците од СДСМ во Штип ја напуштија конститутивната седница – на свечената изјава стоело Република Македонија
- Штипските советници од ВМРО-ДПМНЕ ќе го чекаат заклучокот од инспекцискиот надзор за свечените изјави без уставното име
- Свечените изјави на советниците во Штип се неуставни, оцени Инспекторатот за локална самоуправа
- Штипските советници од ВМРО-ДПМНЕ ќе потпишат свечени изјави со Северна Македонија, а потоа ќе се жалат
- СДСМ: И на советниците во Кисела Вода им дадоа свечени изјави без уставното име
- Преспанскиот Договор е завршена работа, градоначалниците од ВМРО-ДПМНЕ ќе потпишуваат документи со Северна Македонија, вели Јанушев