Свечените изјави без уставното име што ги потпишаа штипските советници од ВМРО-ДПМНЕ и Левица се спротивни на Уставот, е заклучокот на инспекторите од Државниот инспекторат за локалната самоуправа
Советниците на ВМРО ДПМНЕ во Советот на Општина Штип ќе го испочитуваат рокот што им е даден од страна на Државниот инспекторат за локална самоуправа и ќе ги потпишат изјавите со уставното име, информира координаторот на советничката група Душко Иванов, по денешната координација меѓу 13 советници.
Иванов вели дека ќе го испочитуваат законски предвидениот рок од 15 дена, појаснувајќи дека денешната трета седница на Советот била закажана пред седум дена и од тие причини продолжува по предложениот дневен ред.
Претседателката на Советот на Општина Штип, Весна Карагунова-Кожинкова пакистакна дека ќе ги искористат правните лекови и ќе се жалат на второстепената Комисија на решението во кое е забележано дека нивните претходни изјави се неуставни, а одлуките кои ги донесоа на седниците се неважечки. Советниците од опозициската СДСМ дојдоа пред седницата на Советот, но откако беа информирани дека нема да им се понудат свечени изјави со уставното име и ги слушнаа изјавите на Иванов и Карагунова-Кожинкова решија да не влезат во салата и да не присуствуваат на трета седница на општинскиот Совет.
„Со оглед дека ниту видовме волја, ниту желба од страна на мнозинството во Советот на Општина Штип да ме повикаат како координатор на советничката група да поразговараме за можностите за отстранување на овие правни недостатоци, ние и денеска нема да учествуваме во работата на Советот“,
изјави Маријана Рогожарска-Поповска, координатор на советничката група на СДСМ-Штип.
Во свечената сала остана само опозицискиот советник, Зоран Костовски на кого не му беше верификуван мандатот, бидејќи бил на службен пат пред десет дена. Службите му ја понудија свечената изјава на која не беше наведено уставното име на државата, но тој одби да ја потпише со образложение дека е неуставна.
Свечените изјави без уставното име што ги потпишаа штипските советници од ВМРО-ДПМНЕ и Левица се спротивни на Уставот, е заклучокот на инспекторите од Државниот инспекторат за локалната самоуправа, по инспекцијата, откако на 1 ноември советниците од ВМРО-ДПМНЕ кои се мнозинство во Советот на Штип потпишаа свечени изјави со Република Македонија, наместо со уставното име и оттогаш одржаа две седници и донесоа неколку одлуки.
Решението опомена до градоначалникот на Општина Штип и до претседателот на Советот беше доставено пред неколку дена.
Со решението на Инспекторатот опомени заработија градоначалникот Иван Јорданов и претседателката на Советот Весна Карагунова-Кожинкова.