„Треба да им олесниме на граѓаните на мобилниот телефон да ја имаат копијата на својата физичка лична карта и возачка дозвола. Нешто налик на ‘гугл волет’, кога плаќаме со телефон… Тоа е првата фаза и паралелно со тоа мора да се работи на дигитални лични карти кои ќе имаат чип во самата лична карта“, вели новоизбраниот министер за дигитална трансформација
Треба и мора да очекуваме напредок на планот на воведување дигитален идентитет за граѓаните во мандатот на оваа влада – вели министерот за дигитална трансформација Стефан Андоновски во интервју за „360 степени“ на МРТ 1. Според него, ќе се надгради проектот на кој претходно работеше вицепремиерката за политики за добро владеење Славица Грковска и преку соработка со МВР и Управата за водење матични книги ќе се креира дигитална лична карта.
„Два аспекти се важни, прво е важно да имаме пристап до нашата лична карта на нашите мобилни телефони. Треба да им олесниме на граѓаните на мобилниот телефон да ја имаат копијата на својата физичка лична карта и возачка дозвола. Нешто налик на ‘гугл волет’, кога плаќаме со телефон. Да можете со читач да прочитате дека таа лична карта е копија од таа што ја имате. Тоа е првата фаза и паралелно со тоа мора да се работи на дигитални лични карти кои ќе имаат чип во самата лична карта. Не сакам граѓаните да сфатат дека ќе има нов трошок и ново вадење лични документи идната година. Ќе го подготвиме процесот за сукцесивно, при промената на документите, кога ќе им истече рокот – на личната карта, возачката дозвола и патната исправа, во тој момент да се генерира нов“,
рече Андоновски.
Министерот највува и ажурирање на порталот за електронски услуги за граѓаните – uslugi.gov.mk, кој според него е недоволно функционален што се потврдило со извештајот на Државниот завод за ревизија во кој е нотирано дека има само сто илјади корисници, во просек со 0,5 услуги по корисник.
„Поразителни се овие резултати знаејќи дека порталот функционира од 2018 година. Досега порталот требаше да биде најетаблираниот за услуги. Повеќе се причините. Прво, не е пријателски кон корисниците, тие не се чувствуваат дека можат да си ја завршат работата, нешто на што ќе работиме во стоте дена и гарантирам дека со истекувањето на стотиот ден ќе имаме реновиран, подобрен, надграден портал за услуги. Второ, најважните услуги кои им се потребни на граѓаните – вадењето извод, регистрирањето новороденче, венчаница или аплицирањето за венчавање не се присутни на порталот или многу тешко може да ги најдете на порталот“,
вели Андоновски.
Тој додава дека ќе се фокусираат на три работи во следниот период – да се признаваат електронски извадените документи, да нема хибриди, односно целиот процес на вадење документи да биде дигитален и да се реновира порталот со воведување нови услуги.