Овој јули беше најтопол во светот по јули 2019 година и јули 2016 година, соопштија научници од Европската Унија. Според нив, минатиот месец беше обележан со невообичаено високи температури во многу региони – од Финска до САД.
„Кога ги набљудуваме температурите во светот гледаме промени од година во година, па дури и од месец во месец. Но, основното нешто што го гледаме е трендот на глобално затоплување“,
вели Фреја Вамборг, виш научник во Службата за следење на климатските промени на ЕУ, Коперник.
Податоците за Коперник датираат од 1950 година, но се вкрстуваат со други податоци кои датираат од средината на 19 век.
„Минатиот месец беше трет најтопол јули досега во светот, по јули 2019 година и јули 2016 година. Тоа беше и втор најтопол јули во Европа, по 2010 година“,
објави Коперник.
Од рекордната жештина во САД и Канада, која започна во јуни, починаа стотици луѓе и беа предизвикани голем број пожари низ целиот свет.