Според ревизијата, од 16 патнички гарнитури во функција се само пет, додека од 47 патнички вагони во редовен сообраќај се користат само два. Во однос на товарниот сообраќај, од 1 382 товарни вагони дури 1 004 се со истечена ревизија и се надвор од сообраќај, додека само 378 се способни за транспорт
Слабости со возниот парк, имотот, залихите, трошоците и приходите утврдила ревизијата во „Железници на Република Северна Македонија – транспорт“ за 2024 година.
Во извештајот на Државниот завод за ревизија (ДЗР) се наведува дека од 62 локомотиви со кои располага друштвото, во функција се само девет, додека загубата за 2024 година изнесува 331,8 милиони денари, а заедно со пренесените загуби од претходните години достигнува 6,75 милијарди денари односно над 109 милиони евра.
Според ревизијата, од 16 патнички гарнитури во функција се само пет, додека од 47 патнички вагони во редовен сообраќај се користат само два. Во однос на товарниот сообраќај, од 1 382 товарни вагони, дури 1 004 се со истечена ревизија и се надвор од сообраќај, додека само 378 се способни за транспорт.
Во извештајот се наведува дека комапнијата континуирано искажува загуби во работењето, а само за 2024 година е остварена загуба од 331,8 милиони денари, со што вкупната пренесена загуба од минатите години достигнала 6 754 219 000 денари.
Ревизијата утврдила и несоодветно, недомаќинско и небезбедно ракување при прием и издавање нафта, што може да ги загрози безбедноста и здравјето на граѓаните и животната средина. Опремата за мерење е застарена и импровизирана, а пумпите за полнење гориво со години не се баждарени.
Дури 71 отсто од залихите – резервни делови, материјали и автогуми во вредност од 5,5 милиони евра, се постари од 2019 година, а за нив воопшто не е направено вредносно усогласување. Дополнително, компанијата нема имотни листови за голем дел од сопствените згради и сообраќајни објекти.
Наместо навремено подмирување на обврските, во извештајот од ДЗР се наведува дека праксата на претпријатието била поднесување приговори на платни налози, што резултирало со пролонгирање на судските постапки и значително зголемување на обврските по основ на главен долг, камати и судски трошоци.
И покрај постоењето правосилно завршени судски постапки и висока веројатност за одлив на економски ресурси во износ од 260 982 илјади денари, друштвото не извршило резервирање средства согласно МСС 37, поради што обврските, трошоците и финансискиот резултат не се реално и објективно прикажани во финансиските извештаи.
Ревизијата утврдила и нерационална потрошувачка на вода за административни потреби во износ од над 5,4 милиони денари, како и давање услуги без важечки договори и ажурирана ценовна политика.
При ревизијата е утврдено дека постојат слабости и во управувањето со човечките ресурси, примената на законската и интерната регулатива во областа на работните односи, организацијата на работните процеси, како и во системот за пресметка и исплата на плати и надоместоци.
Ревизорите предупредуваат дека ваквата состојба ја доведува во сериозно прашање ефикасноста, редовноста и безбедноста на железничкиот сообраќај во државата.
Од страна на генералниот директор на „Железници на Република Северна Македонија – транспорт“, на 2 ноември 2026 година, до ДЗР била доставена информација со преземени и планирани активности за надминување на констатираните состојби и исполнување на ревизорските препораки.