Во реакцијата, меѓу другото, се наведува дека имаат нулта толеранција за корупција и злоупотреба на академската заедница, оценувајќи дека ваквите случаи придонесуваат за обезбедување подобро, поквалитетно и пообјективно студирање
Откако МВР објави дека полициски службеници вршат претреси на повеќе локации во Штип и во Скопје поради сомнежи за злоупотреба на службената положба од страна на раководител на информатички сектор при Универзитетот „Гоце Делчев“ во Штип, со реакција се јавија од Ректоратот на штипскиот универзитет.
Во реакцијата, меѓу другото, се наведува дека Универзитетот „Гоце Делчев“ овозможува целосна и неограничена соработка со МВР и Обвинителството со цел брзо и целосно расчистување на случајот. Тврдат дека имаат нулта толеранција за корупција и злоупотреба на академската заедница, оценувајќи дека ваквите случаи придонесуваат за обезбедување подобро, поквалитетно и пообјективно студирање.
„УГД останува посветен на темелните академски вредности, на чесност и вистинитост и останува проактивен во насока на сузбивање на девијантните појави. Нашите студенти и нивното образование остануваат во центарот на сите наши активности. Наставниот процес, академските обврски, научноистражувачката работа и меѓународната соработка со низа реномирани европски универзитети продолжуваат да бидат наш приоритет“,
велат од ректоратот на УГД Штип.
Велат дека нема да дозволат каков било сомнеж за нарушување на трудот и вредноста на дипломите на илјадниците чесни студенти, како и на вработените на Универзитетот.
Претходно денеска од МВР информираа дека се вршат претреси на повеќе локации во Штип и во Скопје во рамки на истрага за злоупотреба на службена положба и овластување и оштетување и неовластено влегување во компјутерски систем од страна на раководител на информатички сектор при УГД Штип.