ВМРО-ДПМНЕ не прифаќа да се воведе онлајн-собрание, а таквиот начин на работа е спротивен и на Уставот, порачува Милошоски
Обидот да се протне привремен Деловник за онлајн-работа на пратениците од дома е знак за нефункционалноста на тенкото владејачко мнозинство од 62 пратеници, смета пратеникот од ВМРО-ДПМНЕ, Антонијо Милошоски.
Според него, власта го прави тоа за ја прикрие неспособноста на, како што ја нарекува, „селотејп-коалицијата“ да обезбеди кворум од 61 пратеник за работа на Собранието.
„Претставниците на власта се свесни дека во сегашниот состав имаат најмалку двајца пратеници кои на седници во Собранието доаѓале ’од принова на погибел‘, како и уште двајца пратеници од помалите партии на селотејп-коалицијата, кои се незадоволни од ветеното пред избори и сегашното нивно маргинализирање во извршната власт. Овие околности најавуваат дека власта често ќе биде неспособна да ги собере во кворум пратениците кои ја изгласале. Затоа под превезот на пандемијата и дигитализацијата ќе се обидат да ја сокријат својата неефикасност со проект за онлајн-собрание“,
вели Милошоски.
Ако може шофер на автобус, наставник, лекар, новинар, градежен работник… да биде на работното место, нагласува пратеникот, зошто да не можат и 61 пратеник со високи плати и добри услови за работи.
Тој порачува дека за опозицијата не е прифатлив таков начин на работа, кој го смета и за спротивен на членот 69 од Уставот.
Одржувањето онлајн-седници поради ситуацијата со ковид-19 го најави претходниот министер за информатичко општество и администрација, а сегашен пратеник Дамјан Манчевски.
Тоа вчера беше и една од темите на разговор помеѓу реизбраниот претседател на Собранието Талат Џафери и британската амбасадорка Рејчел Галовеј. Како што соопштија од парламентот, таа му понудила конкретна помош и поддршка во оваа област, со оглед на искуството што го има Велика Британија, каде што пратениците можат да работат и да гласаат од далечина.
Привремениот Деловник за работа од далечина, според Милошоски, е еден од двата знаци за нефункционалноста на мнозинството. Другиот, според него, е што сè уште не се формирани собраниските комисии за европски прашања, за здравство и за политички систем. Тој потсетува дека во претходните пет пратенички состави тие биле формирани во период од 4 до 7 дена од конституирањето на Собранието.