Според Уставот и според Законот за класифицирани информации, пратениците кои поседуваат безбедносен сертификат имаат право на пристап до секој документ државна тајна, а не некои владини министри да ги прераскажуваат тие документи во Собранието. Пристап е да ги имате документот и договорот во раце, да ги анализирате и да знаете кои се добри, а кои се лоши клаузули за буџетот, изјави денеска пратеникот Милошоски
Пратениците со безбедносен сертификат имаат право на пристап до секој документ со назнака „државна тајна“, изјави денеска пратеникот од ВМРО-ДПМНЕ, Антонио Милошоски, кој со уште неколкумина други пратеници со безбедносни сертификати побара од Владата да му се достави договорот за „Бехтел и Енка“.
„Прво, би сакал да кажам дека според Уставот и според Законот за класифицирани информации, пратениците кои поседуваат безбедносен сертификат имаат право на пристап до секој документ државна тајна, а не некои владини министри да ги прераскажуваат тие документи во Собранието. Пристап е да ги имате документот и договорот во раце, да ги анализирате и да знаете кои се добри, а кои се лоши клаузули за буџетот“,
рече Милошоски во изјава за медиумите.
Тој потенцира дека криењето на договорот е најсилна индикација дека тоа што го прифатиле Артан Груби и Димитар Ковачевски има силни индиции за корупција и криминал.
„Секој премиер или министер којшто потпишал добар договор во интерес на државата или граѓаните би сакал тој договор да го види јавноста и обратно, секој оној кој што крие договор од јавноста, само ги потврдува сомнежите дека тој договор е на штета на буџетот и има клаузули кои што се податливи за корупција и криминал“,
рече Милошоски.
Коментирајќи го претседателот на Собранието Талат Џафери, кој вчера на брифинг со новинарите потенцира дека договорот ќе им биде презентиран на оние пратеници со безбедносен сертификат, односно дека нема да го добијат договорот, Милошоски оцени дека Џафери со ваквиот став не личи како прв помеѓу пратениците.
Деветмина пратеници на ВМРО-ДПМНЕ, кои поседуваат безбедносни сертификати, минатата недела упатија писмено барање до премиерот Димитар Ковачевски да им го достави договорот за изградба на Коридорот 8 и Коридорот 10-д.
Пратеникот Антонијо Милошоски од ВМРО-ДПМНЕ тогаш во изјава за медиумите рече дека тие како претставници на граѓаните бараат во најкус можен рок да им биде доставен договорот и оти тоа барање го поднеле врз основа на чл. 68 од Уставот (Собранието врши контрола над Владата), членот 122 од Деловникот на Собранието и Законот за класифицирани информации, кој е заснован на принципот „потребно е да се знае“, кој ја утврдува потребата за пристап до класифицирани информации заради извршување на функцијата.
Ден подоцна, од Владата одговорија дека претставници од Владата и членови на Комитетот за изградба на коридорите 8 и 10-д ќе ги презентираат документацијата и деталите од договорот за изградба на овие два коридори, во соодветна собраниска процедура.
Оттаму потенцираа дека коридорите 8 и 10-д се досега најголемиот инфраструктурен проект во нашата држава, чија вредност изнесува 1,3 милијарди евра.
Влада: Ќе го презентираме договорот со „Бехтел и Енка“ пред пратениците со безбедносен сертификат
Премиерот Димитар Ковачевски вчера потврди дека испратил писмо до претседателот на Собранието со кое го информирал дека тимот на Владата е подготвен на комисија или на тело кое ќе го определи Собранието веднаш да отиде и да го презентира договорот со „Бехтел и Енка“ со сите детали, пред сите пратеници кои поседуваат соодветен безбедносен сертификат.
Ковачевски рече дека штом ќе имаат одговор од Собранието, претставниците од Владата се подготвени веднаш да отидат бидејќи, сепак, на владините претставници треба да им се каже во која комисија треба да го презентираат договорот.
Ковачевски: Кога ќе кажат од Собрание, тогаш ќе биде презентиран договорот со „Бехтел и Енка“
На прашањето дали Јавното претпријатие за државни патишта (ЈПДП) го доставило договорот до Јавното обвинителство, Ковачевски рече дека одговор треба да се побара од овие две институции, а Владата, како што потсети, веќе го задолжи ЈПДП да го достави договорот до Обвинителството.