Хрватскиот претседател Зоран Милановиќ изјави дека е важно датумот за парламентарните избори да не се приспособува на амбициите и интересите на премиерот Андреј Пленковиќ откако во јавноста се појавија информации дека токму Пленковиќ има амбиции да стане потенцијален кандидат за нов генерален секретар на НАТО. Притоа, тој рече и дека Пленковиќ живее за да се „препаркира“ некаде
Милановиќ воедно изјави дека Хрватска не смее да биде заложник на амбициите на премиерот, а позицијата генерален секретар на НАТО, според него, никогаш не функционирала како нешто креативно или, пак, политички важно.
„Мене ми е важно да се избегне приспособување на датумот на избор за потребите на претседателот на Владата и неговите амбиции да се премести во некое високо меѓународно тело. Инаку, во време на криза шефот на НАТО е само медиумски присутен, но тој мора да биде допадлив за Вашингтон и Париз“,
рече Милановиќ.
Тој воедно рече дека не може да го види Пленковиќ како генерален директор на НАТО бидејќи таму во принцип мора да бидете послушни и одговарате на претпоставените, а Пленковиќ според него, низ текот на целата негова кариера им забивал ножеви во грб на лицата што му помагале.
Инаку мандатот на актуелниот шеф на НАТО, Јенс Столтенберг, му истекува на 30 септември, а покрај Пленковиќ, како потенцијални кандидати се споменуваат и романскиот претседател Клаус Јоханис и естонската премиерка Каја Калас. Кој ќе биде следниот генерален директор би требало да биде познато до крајот на јули годинава.