Согласно решението, осудениот се отпушта од КПД „Струга“ на 25.12.2024 година, а условниот отпуст му се смета до 25.4.2025 година, се наведува во соопштението од Кривичниот суд
Основниот кривичен суд Скопје го прифати предлогот на директорот на струшкиот затвор и донесе одлука за условен отпуст на ексшефот на поранешната Управа за безбедност и контраразузнавање (УБК), Сашо Мијалков. Според решението, Мијалков би бил отпуштен од затвор кон крајот на годинава, сè до 25 април следната година.
„Кривичниот совет при Одделението за организиран криминал и корупција, постапувајќи по предлог на директорот на КПД ’Струга’ за условен отпуст на осудениот С.М., по одржана јавна седница, прибавена и разгледана целосна документација, согласно напатствијата на Апелациониот суд Скопје, донесе решение со кое го уважи предлогот на директорот на казнено-поправната установа. Согласно решението, осудениот се отпушта од КПД ’Струга’ на 25.12.2024 година, а условниот отпуст му се смета до 25.04.2025 година“,
се наведува во соопштението од Кривичен суд.
Одлуката на Кривичен следува откако Апелацискиот суд Скопје изминатиот месец ја прифати жалбата на Мијалков и го врати предметот „Империја“ пред Кривичен за повторно одлучување за барањето за условен отпуст.
Уважувањето на жалбата на осудениот Сашо Мијалков, пак, доаѓа откако претходно предлогот на директорот на Казнено-поправниот дом „Струга“ за негов условен отпуст беше одбиен како неоснован.
Пред Мијалков, условен отпуст доби и ексминистерот за транспорт и врски Миле Јанакиески.
Јанакиески, кој издржува затворска казна за случајот „Титаник“, во јуни излегува на слобода откако скопска апелација донесе одлука тој да добие условен отпуст.
Мијалков во струшкиот затвор, кој е од отворен тип, издржува казна од три години за случајот „Империја“ во кој призна вина и се спогоди со Обвинителството за гонење организиран криминал и корупција. Покрај затворската казна, на ексшефот на УБК одземен му е имот вреден околу три милиони евра, меѓу кои 25 стана и парцелата до хотелот „Мериот“.
Контроверзните измени на Кривичниот законик од 6 септември лани донесоа застарување на делото злоупотреба на службената положба и овластување во повеќе предмети во кои се гонеше ексшефот на УБК, меѓу кои и главниот предмет за масовното прислушување „Таргет-Тврдина“.
Тој неодамна доби ослободителна пресуда во случајот „Трезор“ за набавката на опрема за следење на комуникации. Инаку, двата предмета – „Таргет-Тврдина“ и „Трезор“, се најдоа на повторно судење во Кривичен откако скопска Апелација кон крајот на 2022 година ги укина првостепените пресуди. Мијалков, кој во струшкиот затвор работи како возач, куртули и во предметот „Титаник 2“, кој се однесуваше на изборни нерегуларности, каде исто така го спасија измените на Кривичниот законик.