Во оценувањето во Извештајот за 2022 година се следат два аспекта – документите поврзани со националниот буџет, склучените договори и лиценците за концесии
Според Извештајот за фискална транспарентност за 2022 година на Стејт Департментот на САД, С Македонија е меѓу земјите кои ги исполнуваат нивните критериуми за фискална транспарентност, информираат од Министерството за финансии.
Во оценувањето се следат два аспекта – документите поврзани со националниот буџет, склучените договори и лиценците за концесии.
Извештајот прави евалуација на тоа дали владите ги објавуваат буџетските документи во јавноста, вклучително и расходите разложени по одделни буџетски корисници, како и приходите согласно нивните извори. Во оценката се вклучува и дали била извршена надворешна ревизија согласно меѓународните стандарди за независна ревизија на финансиските извештаи, како и дали истата е јавно достапна. Понатаму, се оценува дали процесот на доделување лиценци за концесии и владини договори е согласно законите и регулативата и дали тие се јавно достапни.
„Од 141 земја, кои се квалификуваат за странска помош од САД, согласно евалуацијата на Стејт Департментот, само половина од земјите ги имаат исполнето условите, како Чешка, Естонија, Унгарија, Израел, Латвија, Литванија, Португалија, Сингапур, Словачка, но и Хрватска и Словенија, како и земјите од регионот од Западен Балкан“,
се вели во соопштението од Министерството за финансии.
Преку фискалната транспарентност, се наведува во извештајот на Стејт Департментот, се информираат граѓаните како се трошат приходите од државните буџети и воедно се обезбедува отчетност кон граѓаните, како и доверба и економска одржливост, соопштуваат од Министерството.
Од Министерството за финансии појаснуваат дека во изминатите неколку години преземени се значајни чекори од страна на Владата за подигнување на фискалната транспарентност: воспоставени се повеќе механизми и алатки за подигнување на фискалната транспарентност, меѓу кои и Граѓанскиот буџет, платформата Отворени финансии, Календарот на даночни промени и Фискалниот бројач, кој на дневна основа дава приказ во приходите и расходите од страна на буџетот, реализацијата на капиталните расходи и месечно на реализацијата на државниот долг.
Со новите системски законски решенија, како Законот за буџет и измените на Законот за финансирање на единиците на локалната самоуправа, понатаму ќе се унапредува фискалната транспарентност во земјава, велат од Министерството за финансии.