Меѓу една од препораките на Европската комисија е и масовно тестирање на населението
Рестриктивните мерки и забрани за движење, кои се во сила како превенција од ширење на ковид-19 мора, да се укинуваат постепено за да се спречи втор бран на епидемијата, посочува Европската комисија.
Во препораките до земјите-членки на ЕУ, нема универзален модел на укинување на мерките. Наместо тоа, Комисијата препорачува земјите сами да ги приспсобат мерките на сопствената ситуација и на проценките на домашната стручна фела, посочувајќи дека секоја земја се соочува со различен интензитет на епидемијата.
Меѓу една од препораките на Европската комисија е и масовно тестирање на населението.
„Препораките на Комисијата се темелат на три столба: солидна епидемиолошка анализа, обезбедување на доволен капацитет на здравствениот систем и ефикасен систем на мониторинг на граѓаните, главно преку широко тестирање на населението. Земјите членки побараа од нас да изготвиме патоказ за излез од мерките за изолација, тоа го испорачуваме денеска, но ова не е знак дека мерките може сега да се укинат“,
вели Фон дер Лајен, претседателка на Европската комисија.
Во Македонија, според проценките на здравствените власти од досегашниот развој на епидемијата, можно е постепено укинување на мерките на почетокот или средината од мај.
Министерот Венко Филипче најави и дека неделава ќе почнат да се прават анализи со стопанските комори за постепено враќање во нормала на бизнисот, за, како што рече, да бидеме сигурни дека по рестриктивните мерки нема да порасне бројот на заболени пациенти со ковид-19.