Од германскиот институт за економски истражувања Ифо посочуваат дека делта-сојот претставува сериозна закана за економијата бидејќи економското закрепнување ќе се одложи посебно во бизнисите кои се занимаваат со патувања и малопродажба, како и во угостителството
Германската канцеларка Ангела Меркел денеска побара и другите европски земји да бараат карантин за патници од земји со високо ниво на делта-сојот на коронавирус, како што е Велика Британија.
„Во нашата држава, ако доаѓате од Велика Британија, мора да одите во карантин – и тоа не е случај во секоја европска земја, што би сакала да биде“,
истакна Меркел во Долниот дом на германскиот парламент.
Германскиот институт за економски истражувања Ифо во неделата предупреди дека делта мутацијата може да предизвика сериозна штета на економијата поради повторниот раст на бројот на новоинфицирани.
„Делта-сојот претставува сериозна закана за германската економија. Нема се да се изгуби ако бројот на заразени повторно се зголеми поради новата мутација, но економското закрепнување ќе се одложи, особено во секторите каде пандемијата веќе предизвика голема штета, како што се патувањата, рестораните и малопродажбата“,
нагласи шефот на институтот Ифо, Клеменс Фуест.
Делта-сојот на ковид-19, првпат откриена во Индија, станува глобално доминантна варијанта, предупреди минатиот петок Светската здравствена организација (СЗО). Студиите, како што пред неколку дена пренесе Си-ен-би-си, покажуваат дека тој за околу 60 отсто попренослив од првичниот коронавирус што се појави во Вухан во Кина. Во САД, на пример, тој веќе е раширен на ниво што најмалку 10 проценти од новите случаи се заразени со него. Во Велика Британија, пак веќе е доминантен и со него се заразени повеќе од 60 проценти од новозаразените.
Според последните официјални информации од СЗО, делта-сојот досега е регистриран во 92 земји.