И натаму останува неразјаснето дали испадот и пожарот се причинско-последично поврзани или двата инциденти се засебни и, едноставно, се случиле истовремено. Оваа дилема дополнително се наметнува откако за СДК.МК директорот на МЕПСО, Орхан Муртезани, пред официјалното соопштение, изјави дека напојувањето со струја е прекинато за да им се овозможи на противпожарните едници да интервенираат
Испад на далекувод и пожар. Има две причини поради кои Скопје потона во мрак, соопштија од МЕПСО. Без струја не останал само главниот град, туку и делови од Велес и Овче Поле.
„Испад на далекуводот од ТС Скопје 4 кон ТС Бунарџик и пожар во близина на трансформаторската станица, беше причина за прекин на снабдувањето со електрична енергија во поголем дел од Скопје, делови од Велес и Овче Поле. Овие два фактори го условија испаѓањето од погон на двата 400/110 кV трансформатори, а со тоа и испадот на целата трафостаница Скопје 4 во населбата Пинтија“,
соопштија од МЕПСО.
Но, и натаму останува неразјаснето дали испадот и пожарот се причинско-последично поврзани или двата инциденти се засебни и едноставно, се случиле истовремено. Оваа дилема дополнително се наметнува откако за СДК.МК директорот на МЕПСО, Орхан Муртезани, пред ова соопштение, изјави дека напојувањето со струја е прекинато поради пожарот.
„Каде е точно пожарот и која е причината уште не знаеме, но мора да се прекине со напојување од трафостаницата за да се интервенира од Пожарната единица“,
изјави Муртезани за СДК.МК
Од МЕПСО додаваат дека сега снабдувањето со струја е нормализирано, но дека можни се кратки прекини заради поправање на дефектите.
„Диспечерите на АД МЕПСО во најбрз можен рок воспоставија напон во најголем дел од населените места и таму е нормализирано снабдувањeто со електрична енергија. Дефектите се изолирани и се работи на нивно отстранување. Во оваа прилика АД МЕПСО ги информира граѓаните дека и во текот на вечерта се можни краткотрајни прекини во снабдувањето со електрична енергија, но единствено во насока на сoздавање услови нашите стручни екипи да ги отстранат преостанатите дефекти“,
велат од МЕПСО.