Разликата во платите ќе биде донирана на сметката за солидарност за ковид 19
Одборот на директори на Тутунскиот кобинат АД Прилеп донел одлука во април целиот менаџмент во компанијата да земе минимална плата во висина од 14.500 денари.
„ Според донесената одлука, која е во согласност со усвоените економски мерки на владата за справување со кризата од ковид -19, минимална плата ќе добиваат сите извршни членови на Одборот на директори, како и лица со посебни овластувања и одговорности – раководни лица. Ист износ ќе примаат и неизвршните членови на Одборот на директори, кои во нормални околности примаат месечен паушал“,
информираа денеска од компанијата.
Разликата од износот на минималната плата до целосниот износ на плата ќе биде уплатен на сметката за солидарност ковид 19 што ја отвори Владата.
Од компанијата соопштуваат дека е донесена и одлука дел од вработените, заради намалување на трошоците во компанијата, да користат платен вонреден одмор. За администрацијата тој ќе биде со траење од еден месец, а за дел од вработените во погон 20 дена. Во овој период ќе им биде исплаќан надоместок на плата од 80 проценти, согласно со одредбите од Колективниот договор и Законот за работни односи.
Тутунскиот комбинат од Прилеп, како акционерско друштво целосно во државна сопственост, првпат по речиси две децении, минатата година ја заврши со добивка од над 39 милиони денари.