По препораката бремените жени да се вратат на работа и да се вакцинираат против ковид-19, портпаролот на Комисијата за заштита од заразни болести, докторот Злате Мехмедовиќ, во емисијата „24 анализа“ на ТВ 24, рече дека Комисијата при носењето на заклучоците и препораките се водеше по научните базирани докази.
„Бремените жени како приоритет треба сериозно да ја сфатат вакцинацијата за да го заштитат своето здравје, зошто бременоста е дополнителен ризик. Релевантните институции препорачуваат да има вакцинација особено на бремените жени да се превенира нивното здравје. Треба да се минимизира ризикот на работното место за бремените и да бидат максимално заштитени. Од тој аспект беше разгледувано за воведување на ваквата мерка, но тоа не е дефинитивна одлука, туку препорака до министерот за здравство“,
рече Мехмедовиќ.
Покрај мерката за враќање на работа на бремените жени, Комисијата денеска препорача и укинување на задолжителниот негативен тест или сертификат за вакцинација или прележан ковид при излез од државата.