Откако првообвинетиот Бојан Јовановски денеска уште еднаш побара изземање на судијката обвинувајќи ја дека е политички инструирана, судењето продолжи со изведување материјални докази од Обвинителството
Претседателот на Основниот кривичен суд во Скопје, Иван Џолев, го одбил барањето на Бојан Јовановски-Боки 13 за изземање на судијката Софче Гаврилова-Ефремова од постапување во предметот „Меѓународен сојуз“.
Одлуката на почетокот на денешното рочиште ја соопшти судијката, откако Јовановски ова барање го поднесе на минатото рочиште.
Веднаш потоа, Јовановски побара збор и излезе со ново барање за изземање на судијката, но и на судиите поротници, бидејќи обвини дека целиот судечки совет е политички инструиран. Изнесе и обвинувања за претседателот на судот, Џолев.
„Поднесувам ново барање поради основано сомневање дека судијката е политички инструирана и поврзана со претседателот на овој суд за кој знам добро како е избран оваа функција. Се сомневам дека се работи за политички предмет, дека овој судечки совет е контролиран од политичките власти, од премиерот Зоран Заев и сите останати високи функционери“,
објаснуваше Јовановски.
Тој во голем дел ги повтори обвинувањата и сомнежите што ги изнесе и на минатото рочиште, а денеска додаде и дека судијката Гаврилова-Ефремова не може да суди во овој предмет бидејќи заедно со судијката Васка Николовска-Масевска, со која заедно судеа во случајот „Рекет“, е во контрадикторна постапка. Тоа го посочи алудирајќи дека тој ги гони со кривична пријава за злоупотреба на службената положба и овластувања, обид за убиство и тортура. Обвинувањата за обид за убиство и тортура Јовановски ги темели на тоа што, според него, тенденциозно бил држен во притвор, нешто што и претходно го има истакнато.
Пред почетокот на денешното рочиште, пред медиумите, пак, зборуваше обвинетата експратеничка Фросина Ременски, која беше почесен претседател на „Меѓународниот сојуз“, повторно тврдејќи дека против неа нема докази и дека незаконски бил вршен претрес во нејзиниот дом. Таа рече и дека за тоа ќе поднесе кривични пријави против лица од МВР и од Основното јавно обвинителство за гонење организиран криминал и корупција.
На денешното рочиште Обвинителството продолжи со изведување материјални докази.
Во предметот, Бојан Јовановски-Боки 13 е првообвинет и се товари за делата измама и перење пари. Јасна Мандиќ-Ерцеговиќ, заменик-претседателка на невладината организација, и асистенката на Боки, Христина Блажевска, пак, се обвинети за помагање во овие дела, а Фросина Ременски се товари за помагање во делото измама. Таткото на Боки, Миле Јовановски, пак, е петтообвинет за помагање во перењето пари и за делото неовластено изработување, држење, посредување и тргување со оружје, бидејќи при претрес во неговиот дом биле пронајдени три полуавтоматски пиштоли и муниција за кои немал дозвола. Како правно лице обвинета е и невладината организација.
Во овој предмет Обвинителството тврди дека двајцата бизнисмени, Силјан Мицевски и Ардијан Амзоски, биле доведени во заблуда и измамени со проекти за изградба на Европски центар за возрасни лица и мобилни сервиси, па преку Македонската авторска агенција исплатиле речиси еден милион евра, Мицевски сума од 719 905, а Амзоски 233 821 евра.