„Дали е точно дека идната недела ќе му биде вратена патната исправа на Никола Груевски, бидејќи со измените на Кривичниот законик автоматски се ослободува од одговорност за случајот ТНТ и ‘Траекторија’, додека за другите кривични дела за кои е осуден ќе му се овозможи повторување на кривичната постапка?“, е прашањето кое јавно го постави Меџити на својот официјален фејсбук-профил
Дали е точно дека иднината недела ќе му биде вратен пасошот на поранешниот премиер и лидер на ВМРО-ДПМНЕ, Никола Груевски? Вакво прашање денеска преку објава на својот официјален фејсбук-профил упати лидерот на новоформираната партијата од албанскиот политички блок – Демократско движење, Изет Меџити.
Прашањето на Меџити е во контекст на измените на Кривичниот законик, усвоени од Собранието оваа недела, а со кои, меѓудругото, се намалуваат казните за кривичните дела злоупотреба на службената положба и овластување (член 353) и злосторничко здружување (член 354).
„Дали е точно дека идната недела ќе му биде вратена патната исправа на Никола Груевски, бидејќи со измените на КЗ автоматски се ослободува од одговорност за случајот ТНТ и ‘Траекторија’, додека за другите кривични дела за кои е осуден ќе му се овозможи повторување на кривичната постапка?“,
е прашањето кое јавно го постави Меџити.
Инаку, објавата на Меџити е своевидно надоврзување на ставот кој пратениците на трите партии од т.н. „опозициски блок“ – Алтернатива, Беса и Демократско движење го изнесоа на прес-конференција во Собранието во средата, пред да се донесат измените на Кривичниот законик истиот ден.
Мерита Коџаџику, Сафије Садики Шаини и Фадил Зендели тогаш рекоа дека основната причина поради која власта ги иницира промените на Кривичниот законик е за што побрзо да се спаси, и во Скопје „без трн во ногата“ да се врати Никола Груевски.
„Јавноста има право да знае, а премиерот Ковачевски и министерот за правда Лога имаат обврска да го објаснат ова, дека доколку помине овој предлог за измена на Кривичниот законик, а тие имаат мнозинство да го усвојат, потоа можат слободно да му извадат билет на Никола Груевски во еден правец од Будимпешта до Скопје и да го пречекаат со сите државни почести“,
рекоа пратениците на трите партии во средата.
На ваквите наводи и коментари во врска со измените на Кривичниот законик со реакција и демант на Фејсбук се јави и Груевски.
„Вакви измени во Законот се говорат во јавноста одамна, околу четири-пет години, и од она што можам да забележам од медиумите има многу заинтересирани страни од различни политички провиниенции за истите да се изгласаат. Во мојот случај на прогон истите имаат минорно учество. Јас и повеќе мои соработници сме под прогон за не сторени работи, на тој прогон заднината е страв од конкуренција и желба за политичка елиминација и тоа се нарекува политички прогон. Тој прогон трае и до ден-денес и сеуште трае и расте стравот на многумина од неговото запирање или неуспех. И имаат причина за страв!“,
напиша на на Фејсбук поранешниот премиер, сега бегалец во Унгарија, Груевски.
Измените на Кривичниот законик, кои Владата „тајно“ ги утврди, а Собранието експресно ги донесе по скратена постапка (со европско знаменце), а претседателот Стево Пендаровски ги потпиша, од завчера се објавени во „Службен весник“ со датум 7 септември 2023.
Измените се однесуваат на 38 члена од Кривичниот законик, за кои власта рече дека 35 се за усогласување со директивите на ЕУ.
Она што предизвика бура негативни реакции во јавноста е што измените опфатија промена на членовите кои се однесуваа на злоупотреба на службената положба и овластувања (член 353) и злосторничкото здружување (член 394).
Со изгласувањето, пратениците ги намалија пропишаните казни за двете кривични дела, воведоа горна граница на максималната казна, а и укинаа еден став од членот за злоупотреба на службената положба и овластувања. Со тоа предвидоа и порано застарување на делата.
Измените на Кривичниот законик, како што е предвидено, ќе стапат на сила на осмиот ден од објавувањето во „Службен весник“. За повеќето членови е наведено дека ќе почнат да се применуваат шест месеци по стапувањето на сила, но тоа не се однесува и на измените на делата за злоупотреба на службената положба и овластувања што значи дека тие ќе почнат да важат веќе за една недела отсега.
Експресните измени на Кривичниот законик предизвикаа жестоки реакции во јавноста. Вчера и претседателката на Уставниот суд, Добрила Кацарска, изјави дека е фрапирана од тоа како се однесени измени, за кои таа лично не знаела.
Премиерот Димитар Ковачевски, одговарајќи на новинарски прашања вчера, рече: „Ако го прочитате Законот, тогаш ќе видите дека нема никакво помилување и никаква амнестија за никого, туку, напротив, има конкретизација на кривичните дела што некој ги направил“.