По пријавата на случајот, на терен излегла екипа од Полициската станица Гостивар, а по утврдувањето на состојбите следни чекори се очекува да преземат надлежните министерства, институции, јавни претпријатија и Општина Гостивар, велат од ЦУК
Мечка пред два дена убила и изела неколку овци откако влегла во трло кај селото Равен, Гостиварско, соопшти утрово Центарот за управување со кризи (ЦУК).
Како што информираат оттаму, случајот бил пријавен синоќа во 20:45 часот на единствениот број за пријавување итни случаи 112.
На видеоснимките што ги испратија од ЦУК, а кои сведочат за нападот, може да се види штетата што ја предизвикала мечката, но поради сензитивната содржина не ги објавуваме.
„Пријавителот информирал дека пред два дена, на 11 јуни во вторникот, мечка му убила и изела шест овци. Трлото, каде што го чувал стадото, било на периферијата на село Равен“,
се вели во информацијата од Центарот за управување со кризи.
По пријавата на случајот, на терен излегла екипа од Полициската станица Гостивар, а по утврдувањето на состојбите следни чекори се очекува да преземат надлежните министерства, институции, јавни претпријатија и Општина Гостивар.
Инаку, случаите со сè почестата појава на мечки во населените места особено во северозападниот дел на земјата почнаа да добиваат загрижувачки димензии.
Ловот на мечки во Македонија е трајно забранет. Но, овој вид многу се намножи особено во националните паркови „Маврово“ и „Шар Планина“.
Најалармантно беше во реканското село Жировница особено во текот на летото и есента минатата година кога мечките напаѓаа домашни животни, а имаше случаи во кои се обидуваа да влезат во куќите.
Годинава беше пријавен случај во кој мечка нападна сточар на планината Мукос, кај месноста „Сеча“, во атарот на селото Оморани во Општината Чашка, нанесувајќи му повреди по телото.
Со повреди помина и турист од Данска, кој скијајќи заедно со десетчлена група на необележани патеки кај местото Јелак над Попова Шапка беше нападнат од мечка, која била со своите млади.
Овие животни често можеа да се забележат и на патиштата во северозападниот дел на државата, а имаше случаи каде што некои беа прегазени додека со своите млади минувале преку коловозот.
Владата донесе мерки меѓу кои беа чистење на дивите депонии за да не ги привлекуваат мечките да се хранат од нив, како и оградување на легалните депонии. На владина седница, исто така, надлежните министерства беа задолжени да изготват план за решавање на проблемот.