Ова е најголем масакр во основно училиште во САД по трагедијата во Сенди Хук во Конектикат во 2012 година, во која беа убиени 26 лица, од кои 20 деца на возраст меѓу шест и седум години
Најмалку 19 ученици и двајца возрасни се убиени при пукање во основното училиште „Роб“ во Увалда, Тексас, на околу 130 километри од Сан Антонио.
Напаѓачот, идентификуван од властите како Салвадор Рамос, е мртов и се верува дека дејствувал сам. Гувернерот на Тексас, Грег Абог, изјави дека 18-годишниот Рамос посетувал средно училиште во Увалда, објави Си-ен-ен.
Ова е најголем масакр во основно училиште во САД по трагедијата во Сенди Хук во Конектикат во 2012 година, во која беа убиени 26 лица, од кои 20 деца на возраст меѓу шест и седум години.
Според Си-ен-ен, се верува дека Рамос ја застрелал својата баба пред да замине во основно училиште, изјавија три полициски извори за Си-ен-ен. Таа е во критична состојба во болница, изјави претставникот на Канцеларијата за јавна безбедност во Тексас, Ерик Естрада.
Напаѓачот имал панцир, а со автомобилот направил сообраќајка пред да пристигне во училиштето, изјави Естрада. Полицијата се обидела да го спречи, но тој сепак успеал да влезе и почнал да пука.
Во престрелката е ранет најмалку еден член на граничната патрола.
Фотографија од две пушки АР15 беше објавена на профилот на Инстаграм поврзан со напаѓачот, само три дена пред пукањето.
TX elementary school shooter before the photos disappear. From his Instagram. #SalvadorRoma #Uvalde #shooting pic.twitter.com/nr3r5YiTsi
— 🇺🇦🇺🇲🌻#StandWithUkraine #FedUp🌻 🇺🇦🇺🇲 (@Jkgrayyyz) May 24, 2022
Има само една објава за мобилна игра на неговиот профил на Тик-ток, но под фотографијата на профилот има порака со содржина: „Децата треба да се плашат во реалниот живот“.
Директорот на основното училиште изјави дека преостанатиот дел од учебната година, кој требаше да заврши в четврток, е откажан.
Kога САД ќе застанат на патот на лобито за оружје, праша претседателот на САД, Џозеф Бајден, во обраќањето до нацијата по маскрот.
„Се надевав дека како претседател нема да мора вака да се обраќам. Масовната пукотница во основното училиште во Увалда е уште еден масакр во САД… Убави, невини деца, од второ, трето, четврто одделение. А колку деца беа присутни и гледаа додека нивните пријатели гинеа како да се на бојно поле?“,
рече Бајден.
Американскиот претседател, говорејќи за големината на загубата, рече дека да изгубиш дете е како да откинеш дел од душата.
„Тоа е како да се задушувате. Барам од нацијата да се моли за жртвите и да му застанеме на патот на лобито за оружје. Ве молам да им дадеме сила на родителите и на браќата на загинатите во оваа темнина што ги снашла. Како држава мора да се запрашаме, кога ќе се попречиме на патот на тоа лоби за оружје? Кога ќе го направиме она за што длабоко во себе знаеме дека треба да се направи?“,
додаде Бајден.
Осврнувајќи се на прашањето за Законот за контрола на оружјето, Бајден побара од пратениците да ја претворат оваа болка во акција, притоа потсетувајќи на сличниот инцидент што се случи во основно училиште во Њутаун – Конектикат од 2012 година кога тој беше потпретседател.
„Уморен сум од се, уморен сум. Мора да дејствуваме. Немојте само да ми кажете дека не можеме да реагираме по овој масакр. Зошто дозволуваме тоа да се случи“,
рече Бајден.
Според Си-ен-ен, оваа година во САД имало 212 масовни престрелки, а тој ги дефинира како напади во кои четири или повеќе лица биле ранети или убиени, не вклучувајќи ги напаѓачите.