На видео средбата со Мас и Османи било истакнато дека претседателството на Германија со ЕУ нуди неповторлива и неодминлива шанса за Северна Македонија
Германија го поддржува почетокот на преговорите на Северна Македонија со ЕУ до крајот на 2020, порача германскиот министер за надворешни работи, Хајко Мас на видео средбата со неговиот македонски колега Бујар Османи.
Мас истакна дека со Османи имале многу контруктивен разговор за темите на европската соработка.
Во однос на барањата од Бугарија која поставува дополнителни услови за нашата земја за старт на преговорите, Мас рече дека преговори се водат на билатерално ниво и на ниво на ЕУ и оти е оптимист дека овие прашања во скоро време ќе бидат затворени.
„Што се однесува до јазикот, до името, тоа се многу детални преговори кои што се одвиваат. Тоа се прашања кои што билатерално мора да се решат меѓу Северна Македонија и Бугарија. Тие се обидуваат да изнајдат решение и тоа го поддржуваме да биде што е можно побрзо за да може да се продолжи со пристапниот процес за Северна Македонија бидејќи таа веќе долго чека на тоа. Преспанскот догововр – нешто историско беше постигнат во Северна Македонија и затоа сум оптимист дека прашањата кои што се отворени во догледно време ќе можат да бидат решени. Меѓутоа за тоа потребни се понатамошни разговори кои ќе треба да се одржуваат како на ниво на ЕУ исто така и помеѓу Северна Македонија и Бугарија“,
рече Мас.
Османи, пак истакна дека заеднички констатирале дека завршетокот на 2020 година и претседателството на Германија со ЕУ нуди неповторлива и неодмнилива шанса земјава да започне со исполнување на вториот важен државен стратешки приоритет – членството во ЕУ, покрај членството во НАТО.
„Одржувањето на првата Меѓувладина конференција, често користен технократски термин, има големо симболично значење за нашиот европски пат. Тоа ќе значи потврда на реформската определба и европскиот курс на земјата. Покрај политичката симболика, стартот на преговорите ќе значи почеток на најобемната и најкомплексната административно – техничка операција со која досега сме се соочиле. Тоа е сериозен предизвик за целото општество, а не само за Владата, во кое ќе мора да ги подигнеме своите перформанси и сите заедно како политичари, државни службеници, но и стопанственици, синдикати и претставници на граѓанското општество да ја сплотиме својата енергија и напори кон остварување на оваа цел“,
рече Османи.
Заложбата на Германија за почеток на пристапните преговори со Северна Македонија до крајот на годинава е содржана и во писмото што шефот на германската дипломатија, Хајко Мас, на средината на септември му го пратил на вицепремиерот за европски прашања Никола Димитров.