Притоа, како централни теми за натамошно приближување на Северна Македонија кон ЕУ остануваат владеење на правото, но исто така и ефективно сузбивање на корупцијата и организираниот криминал, наведува шефот на германската дипломатија Хајко Мас во писмо до вицепремиерот Никола Димитров
Одржување на првата меѓувладина конференција со ЕУ до крајот на годинава, како заедничка цел на Северна Македонија и Германија, ќе биде главна тема на посетата на вицепремиерот за европски прашања, Никола Димитров, утре и задутре (30 септември и 1 октомври) на Берлин, соопштија од СЕП.
За време на престојот во Германија, Димитров ќе се сретне со државниот министер за Европа, Михаел Рот, главниот советник за надворешна и безбедносна политика на канцеларката Ангела Меркел, Јан Хекер, советникот за надворешна политика на претседателот Штајнмаер, Томас Багер, како и со одговорните за ЕУ-политики и за регионов во германското МНР.
Заложбата на Германија за фактички почеток на пристапните преговори со Северна Македонија до крајот на годинава е содржана и во писмото што шефот на германската дипломатија, Хајко Мас, на средината на септември му го пратил на вицепремиер Димитров.
Во дописот, кој е одговор на писмото на Димитров, Мас му честита за изборот на новата функција и нотира дека покрај успесите од минатите неколку години, пред Северна Македонија претстојат сериозни предизвици.
„Ние ја поддржуваме вашата цел до крајот на годината, уште за време на германското претседавање со Советот на ЕУ, да се одржи првата меѓувладина конференција. Притоа, како централни теми за натамошно приближување на Северна Македонија кон ЕУ остануваат владеење на правото, но исто така и ефективно сузбивање на корупцијата и организираниот криминал“,
пишува во писмото на Хајко Мас.
Посетата на Димитров на Берлин е прва на владин претставник по изборот на новата влада во Северна Македонија и доаѓа во период кога земјите членки на ЕУ дискутираат за Преговарачката рамка за земјава.