Според министерот за правда, битно е пописот да се одржи пред локалните избори, затоа што резултатите од него ќе им користат и на идните градоначалници
Мошне важно е резултатите од пописот да се добијат пред локалите избори, за да можат идните градоначалници да креираат релевантни и издржани програми и проекти, оценува министерот за правда Бојан Маричиќ по отворањето на дебатата во јавноста за можно ново одложување на статистичката операција.
Маричиќ апелира и да се намали, како што вели, непотребната тензија во општеството пред статистичката операција и да им се остави на статистичарите да го спроведат пописот следејќи ги највисоките стандарди.
Според министерот, одложување на пописот, како што бара опозицијата, ќе биде само на штета на државата.
„Тие бараат пописот да се одложи за следната година. Минатата година кога разговаравме за пописот бараат тој да се одложи за оваа година и најверојатно тоа ќе им биде барање – да одложуваме секоја година. Затоа мислам дека ако и сега одложиме тоа нема многу да промени, бидејќи сега е вистинскиот момент, сега се вклучува машината во Државниот завод за статика. Мислам дека не е соодветно тоа да биде летно време, кога луѓето патуваат, одмараат и е жешко. Наесен, пак, имаме локални избори, а до локалните избори треба да ги имаме резултатите. Градоначалниците треба да ги планираат и предлагаат политичките врз основа на новите резултати“,
изјави Маричиќ во гостување на „Утрински брифинг“.