Премиерот вели дека истрагата е кај обвинителството, односно дека Владата не испитува одговорност во сопствените редови, затоа што нејзините членови „може да бидат пристрасни меѓу себе“
Министерот за правда Бојан Марчиќ изјави денеска дека најверојатно е првиот член во Владата кој дознал дека се подготвува бегство на обвинетиот Сашо Мијалков. За тоа, како што рече, разбрал во петокот вечерта, на неформална средба со јавен обвинител, кога му било посочено оти постоја шпекулации, дури и како чаршиски муабет, дека е можно такво нешто.
Маричиќ нагласи дека не чувствува никаква одговорност.
„Како човек што води сериозна институција, му укажав на обвинителот дека треба да се проверат гласините, бидејќи не ми беше соопштено кој е изворот, односно тоа беше зачувано како податок што не ми е достапен ниту, пак, ми го кажа обвинителот. Замолив да се проверат тие наводи и доколку тоа има основа и се потврдат тие гласини, обвинителството да ги преземе потребните мерки“,
изјави Маричиќ.
Дополни дека, колку што знае, веќе утрото, обвинителката Вилма Русковска се јавила кај министерот за внатрешни работи Оливер Спасовски и кај државниот обвинител и тргнала постапката.
„Не знам што можев јас да направам повеќе од тоа во тој момент. Впрочем, дејството се случи во неделата вечер, до кога имаше доволно време да се преземат сите мерки. Министерството за правда нема под себе ниту обвинителство ниту полиција за да може да направи што било, само можам да пренесам информација“,
рече министерот за правда.
Премиерот Зоран Заев изјави денеска дека одговорност за случајот со Мијалков ќе има, без разлика што, со сите чекори што ги презедоа институциите, го принудиле ексдиректорот на УБК да се пријави пред правдата и да го прими решението за притвор.
„Исто така, охрабрив да продолжи истрагата за евентуална одговорност. Истрагата нормално ја водат обвинители. Логично е од средата наваму, по откривањето на Мијалков, истрагата да биде распоредена кај некој обвинител, да види дали системот имал некаде слабости, некои пропусти или слично и да ги оквалификува и окарактеризира од каков тип и природа се. Тоа секако е со цел да не се повторуваат одредени слабости, доколку постоеле“,
нагласи Заев.
Тој додаде дека за тековна истрагата повеќе детали ќе може да каже јавното Обвинителство кое и го води целиот случај околу „бегството“ на Мијалков и класифицирањето и систематизирањето на неговиот имот.
Запрашан дали има „префрлање на топката“ меѓу јавното обвинителство и одредени министри околу овој случај, Заев рече дека ЈО добило информацијата за можно бегство на Сашо Мијалков и соодветниот јавен обвинител му го соопштил тоа на министерот за внатрешни работи Оливер Спасовски и на другиот министер надлежен во тој дел – министерот за правда Бојан Маричиќ.
„По информации дека е можно бегство, во саботата, кога е веќе тоа потврдено, јавниот обвинител се јавува на министерот за внатрешни работи, при што јавниот обвинител е самостоен во ваквата постапка. Доколку има такви информации, логично е, како и што постапил, да бара и од самиот суд изрекување мерка притвор“,
додаде Заев и истакна дека барањето е поднесено некаде околу 14 часот, а некаде околу 18:30 Судот носи мерка за домашен притвор.
Околу одговорноста на министри за целиот случај, премиерот нагласи дека Владата не испитува одговорност во сопствените редови, заради тоа што нејзините членови „може да бидат пристрасни меѓу себе“.
„Јавното обвинителство е тоа што води истрага со сите елементи. Заради тоа што тоа е независен дел од работењето на системот и за да ни покаже точно каде имало пропусти – секако доколку постоеле пропусти“,
додаде Заев.