Вицепремиерот додаде оти верува дека таа општествена дебата со граѓанските организации и со академската јавност, како и со бизнис-заедницата околу важноста на политичкото и на економското значење на уставните амандмани ќе биде вовед во институционалната дискусија и продолжението на оваа процедура внатре во Собранието
Прашањето за уставните измени во наредните неколку недели и месеци ќе биде актуализирано на дебати со граѓанските организации и експерти, изјави вицепремиерот за европски прашања, Бојан Маричиќ на денешната прес-конференција во Владата.
Ова прашање, како што истакна тој, освен во однос на содржината на уставните измени, ќе биде актуализирано и во однос на нивното политичко значење.
„Политичкото значење е многу повеќе од само уставни промени на еден дел од Преамбулата и на еден амандман на комитетот за односи меѓу заедниците. Овие уставни амандмани и практично значат зелено светло од наша страна, од нашето Собрание за продолжување на преговорите со Европската Унија“,
изјави Маричиќ, одговарајќи на новинарско прашање.
Вицепремиерот, додаде, оти верува дека таа општествена дебата со граѓанските организации и со академската јавност, како и со бизнис-заедницата околу важноста на политичкото и на економското значење на уставните амандмани ќе бидат вовед во институционалната дискусија и продолжението на оваа процедура внатре во Собранието.
„Така што треба да сме подготвени и треба сите да дадеме свој придонес во овој процес за да може тој успешно да започне и уште поважно успешно да заврши“,
рече вицепремиерот за европски прашања, Бојан Маричиќ.
Премиерот Димитар Ковачевски на истата прес-конференција со Маричиќ на која ги презентираа резулатите од скрининг-порцесот со Европската Унија уште еднаш ги повика пратениците во Собранието да ги стават настрана политичките и идеолошките разлики и да ги донесат одлуките за продолжување на евроинтеграцискиот процес.
Иако не спомена експлицитно, јасно е дека повикот на Ковачевски се однесува на уставните измени, кои се услов за отворање на преговарачките поглавја со ЕУ, што треба да се случи најдоцна до ноември годинава, кога завршува скрининг-процесот со ЕУ, како прва фаза од почетокот на преговорите.
Тој посочи дека како Влада имаат јасна цел – членство во Европската Унија до 2030 година, цел која, како што посочи премиерот, иако за многумина е многу амбициозна, сепак не е невозможна.
Затоа сега, порача премиерот, сите во државата треба да се фокусираат на реформите.
„Пратениците се гласот на граѓаните во законодавниот дом, постигнувањето на заедничките национални и општествени цели мора да го стават пред политичките и идеолошките разлики. Некои одлуки треба да ги донесеме поради сите граѓани на Северна Македонија. Нивната иднина е пред сите политички и идеолошки разлики. Без разлика на политичката припадност вие пратениците сте избраници од граѓаните и затоа мора да покажете конструктивност во име на граѓаните, мора да покажете единство за благосостојба на нашите граѓани и нашето општество“,
рече премиерот.