Победничката демонстрација за иновативна технологија се паметни очила кои преку иновативни сензори и вештачка интелигенција ги препознаваат изразите на лицето, а преку тоа даваат информации за емоционалната состојба и однесувањето на корисникот што ги носи
Научници и инженери од Македонија се дел од тимот што освои прва награда на меѓународната конференција „Убикомп“ (Ubicomp) во Англија. Тие заедно со своите англиски колеги од „Емтек лабс“ (Emteq Labs) добија прва награда за најдобра демонстрација на иновативна технологија – паметните очила „OCOSense“.
„Победничката демонстрација покажува паметни очила кои што преку иновативни сензори и вештачка интелигенција ги препознаваат изразите на лицето, а преку тоа даваат информации за емоционалната состојба и однесувањето на корисникот што ги носи“,
објаснуваат учесниците на меѓународна конференција.
Овие очила се првата платформа за препознавање на изрази на лицето, човечки активности и однесување во светот, објаснува извршниот директор и водечки научник во „Емтек лабс“, д-р Чарлс Ндука.
Овие очила, како што додава тој, наскоро ќе бидат достапни за сите истражувачи.
„Многу корисници ќе имаат корист од можноста за следење на далечина на домашен третман или медицинска терапија, вклучувајќи ги луѓето со депресија, Паркинсонова болест, парализа на лицето и други слични состојби“,
вели д-р Ндука.
Македонскиот тим научници и инженери што ги создаваат наградените алгоритми за вештачка интелигенција во „Емтек лабс“ го сочинуваат: д-р Христијан Ѓорески, д-р Мартин Ѓорески, м-р Ивана Кипријановска, м-р Симон Станковски, Филип Панчевски и Бојан Софрониевски.