Македонската фирма што Фејсбук ја карактеризира како „сајбер платеник“ е регистрирана како акционерско друштво со седиште во Скопје, чиј управител е Иво Малинковски
Фејсбук блокираше седум компании од својата платформа поради интернет шпионажа, а на листата се наоѓа и една компанија од нашата држава, пишува „Гардијан“.
Компаниите се блокирани бидејќи ја користеле платформата Фејсбук за да шпионираат 50.000 луѓе во 100 земји ширум светот.
Македонската фирма која Фејсбук ја карактеризира како „сајбер платеник“ е „Сајтрокс“, која е регистрирана како акционерско друштво со седиште во Скопје, а чиј управител е Иво Малинковски. Компанијата е регистрирана како друштво за софтвер, трговија и услуги, со седиште во центарот на Скопје. Според податоците на „Бизнис мрежа“, компанијата има 16 вработени.
Странски медиуми пишуваат дека биле отстранети 300 Фејсбук и Инстаграм профили на компанијата „Сајтрокс“, кои се користеле за измама, а се споменуваат и 10 држави во кои „Сајтрокс“ имала клиенти. Помеѓу овие земји се Египет, Ерменија, Грција, Саудиска Арабија, Оман, Колумвија, Брегот на Слоновата коска, Виетнам, Филипините и Германија, називот на софтверот кој го користела македонската фирма бил „Предатор“.
Биле откриени и „голем број“ веб-страници кои се имитација на големите јавни компании како „Епл„, „Фокс њуз“, „Гугл“, „Инстаграм“ и производителот на автомобили „Тесла“. Се претпоставува дека тие би можеле да се користат во „фишинг“ напади врз таргетирани цели соопшти Фејсбук.
Откако светските медиуми ја објавија оваа вест, „360 степени“ се обиде да добие повеќе информации контактирајќи го седиштето на оваа фирма, меѓутоа оттаму не успеавме да добиеме никој.
Од МВР пак за „360 степени“ велат дека досега немаат добиено известување од Фејсбук дека македонска фирма учествувала во интернет шпионирање.
Покрај „Сајтрокс“, обвинити за фишинг, односно интернет шпионажа и банирани од Фејсбук се и компании од Кина, Израел и Индија.