Македонија стана дел од Програмата за дигитална администрација ИСА 2 на Европската Унија, преку која се поддржуваат активности за развој на ИКТ во јавната администрација, давање електронски услуги и генерално дигитализација во јавниот сектор.
Договорот за пристапување кон програмата го потпишаа министерот за информатичко општество и администрација Дамјан Манчевски и комесарот за буџет и администрација Јоханес Хан.
„Едноставно кажано, ова е местото каде што се прават планови за развој на информатичкото општество и размена на искуства помеѓу државите членки, како и развој на нови стандарди и технологии од областа, а ние ќе можеме да дадеме свој придонес. Оваа програма е наменета за земјите членки на Европската Унија, но направен е исклучок да се дозволи и нашата држава како земја кандидат, да биде активен член“,
истакна министерот Манчевски во видеообраќањето по потпишувањето кое поради препораките за ковид-19 беше дигитално.
Од економски аспект, придобивките за нашата држава се во однос на членарината за учество во оваа програма која е со помал износ од годишните трошоци кои ги има државата за приклучок кон TESTA-ng мрежата.
По завршувањето на оваа програма, таа ќе се трансформира во уште поголема програма именувана „Дигитална Европа, која ќе се занимава со поголемата слика на дигитализација во Европската Унија. Тука ќе се разгледуваат и носат идните стандарди и насоки за развој на дигиталната агенда. Северна Македонија активно ќе учествува во дефинирањето на идните решенија и стандарди од ова поле кои понатаму и ние ќе ги имплементираме и примениме.
Комесарот Хан вели дека со пристапување на Северна Македонија кон оваа програма, земјава е веќе дел од Европската Унија и ги поздрави напорите за приклучување кон ИСА2. Како потврда за тоа е отстапката што ЕУ ја прави, овозможувајќи и на Северна Македонија, полноправно членство во оваа програма.