„Сакаме што побрзо да заврши овој процес, да биде изградена Универзалната сала, објект кој е во колективната меморија на скопјани, но со постапка што е легална“, вели министерот за култура
Целата документација за Универзалната сала е предадена во Основното јавно обвинителството. Се надевам дека истражните органи ќе постапат согласно своите надлежности. Ова денеска го рече министерот за култура и туризам Зоран Љутков на прес-конференција на која го презентира сработеното во првите 100 дена од стапувањето на позицијата во Министерството, при што посочи дека Универзалната сала ќе биде готова до 2028 година, но изградена на легален начин.
„Би сакал да кажам кои би биле следните чекори што како Министерство за култура и туризам и како Влада ќе ги преземеме и со кои на законски начин ќе ја доведат Универзалната сала во 2028 година да биде дел од европска престолнина на културата“,
рече тој.
Посочи дека Универзалната сала е преземена од страна на Град Скопје на незаконски начин, како и дека се констатирани многубројни прекршувањата на законските прописи во постапката за преземање на реконструкцијата на салата и во постапките за спроведување на јавните набавки.
„Постапката е започната со одлука на Град Скопје како постапка за примена на инвеститор согласно Законот за градење. Склучениот договор меѓу Министерството за култура и Град Скопје содржи контрадикторни одредби и не е заверен на нотар. Не содржи таксативно кои права и обврски се предаваат и што всушност се предава. Договорот меѓу Градот Скопје и Министерството за култура, како и Решението за реконструкција од 22 март годинава издадено од Општина Центар не се запишани во Катастарот на недвижности. Постапката продолжува како промена на инвеститор, со низа недостатоци и недефинирани права и обврски Продолжува со барање за реконструкција, а не со барање на промена на инвеститор како предвидува законот и постапката за е-градежна дозвола“,
вели Љутков.
Постапката завршува, како што вели Љутков, со издавање решение за реконструкција каде како соинвестутори се наведени Град Скопје и Министерството за култура.
„Во постапката е преземана проектна документација директно од правно лице за проектирање, а не од претходниот инвеститор, односно од Градот Скопје. Не е примопредадена целата документација која е потребна за да се продолжи со реконструкција со Универзална сала. Не е донесена одлука за престанок и давање на користење на објектот на Универзалната сала. Со тоа, на Министерството за култура и туризам не му биле пренесени во целост правата и обврските согласно закон за втора фаза на реконструкција на салата“,
рече министерот.
Според него, Министерството за култура и туризам исполнил само еден од двата кумулативни законски услови за да може да се стекне со статус на инвеститор, односно тој да биде носител на правото на градење.
Посочи и дека се поништени јавните набавки распишани и спроведени од страна на поранешното раководство на Министерството за култура, а кои се однесуваат на реконструкција на Универзалната сала.
„Во тек е подготовка на стручен извештај со податоци за извршените и неизвршените градежни работи на објектот, како и за евентуална потреба од изведување на дополнителни градежни работи предизвикани од пожарот што го зафати овој објект. Во меѓувреме, до Владата се доставени измени на постојниот Закон за култура со кои ќе се номинира надлежноста на Министерството за култура и туризам да го врши правото на реконструкција и над објекти што се во општинска сопственост“,
рече тој.
По закон, Министерството не може да гради објекти што не се од национален интерес, односно не може да гради локални установи.
„Сакаме што побрзо да заврши овој процес, да биде изградена Универзалната сала, објект кој е во колективната меморија на скопјани, но со постапка што е легална“,
вели министерот.
Затоа, посочи дека Министерството за култура и туризам не може да гради нешто што не е законски преземено.
„Сега повторно ќе ја истераме целата постапка на преземање, но на легален начин“,
рече тој.