Коалициските партнери во власта се согласни дека за предлог-законот прво треба да се отвори широка јавна дебата, а потоа да биде испратен и на мислење до Венецијанската комисија од каде што очекуваат позитивен одговор
Владината коалиција е во координација во врска со најавуваниот закон за правична застапеност, кој треба да ја замени алатката „балансер“ пред тој да се најде на седница на Владата. Ова е заклучокот од изјавите што од одделни настани денеска ги дадоа министрите за здравство и животна средина, Арбен Таравари и Изет Меџити, од коалицијата „Вреди“ и владината портпаролка Марија Митева.
Коалициските партнери во власта се согласни дека за предлог-законот прво треба да се отвори широка јавна дебата, а потоа да биде испратен и на мислење до Венецијанската комисија.
„Има готов закон кој треба да го синхронизираме и да го координираме. Нема ништо лошо ако се бара дополнително мислење. Добредојдено е мислењето на Венецијанската комисија за законот за правична застапеност. Сметам дека е неспорно овој закон да помине во Собранието што поскоро и нема ништо лошо ако земаме второ мислење“,
изјави денеска министерот за здравство Арбен Таравари.
Очекува позитивен одговор од Венецијанската комисија бидејќи, како што рече, законот е работен со меѓународни експерти кои се кредибилни и респектирани во институциите на меѓународното право.
Ставот на Владата, како што денеска повтори владината портпаролка, е законското решение да биде испратено до Венецијанската комисија пред да биде усвоено во Собранието.
„Прашањето е отворено, ќе се разговара во рамки на коалицијата и ќе се отвори широка дебата“,
рече Митева.
Прашан за содржината на предлог-законот, министерот за животна средина Изет Меџити рече дека не може да открива, но кажа дека во јавните дебати ќе се вклучат академици од сите универзитети и стручни професионалци од областа со цел, како што кажа, изработка на законско решение кое во иднина нема да биде оспорувано.
„Мора да внимаваме на уставната категорија правична застапеност, но воедно да не дојдеме во судир со Уставот и во иднина да ни се случи повторно оваа ситуација“,
изјави Меџити.
Темата за изработка на закон за правична застапеност во јавноста власта ја отвори непосредно пред Уставниот суд и формално да ја укине алатката „балансер“ која се користеше при вработувањата во администрација.