Од неговиот кабинет денеска потврдија дека вицепремиерот во претходните три работни дена бил на одмор, но не ја открија дестинацијата на која отпатувал, како што и не ги демантираат информациите дека бил во Дубаи
По неколку дена отсуство од јавни настапи, но и од социјалните мрежи, вицепремиерот за борба против корупцијата и генерален секретар на СДСМ, Љупчо Николовски, се огласи на социјалните мрежи со информација за неговите попладневни активности.
„Работен состанок со партиската Централната изборна комисија. Сè е подготвено за првите директни внатрепартиски избори коишто на 21 март, ги организира токму СДСМ. Во 80 општини ширум земјава, во секоја Општинска организација на СДСМ, в недела ќе бидат отворени гласачките места“,
напиша Николовски најавувајќи ги изборите за лидер на социјалдемократите, на кој единствен кандидат е актуелниот претседател Зоран Заев.
Отсуството на Николовски поттикна шпекулации дека тој заминал на продолжен викенд во Дубаи, што наиде на критики и од опозицијата дека во време на криза и ковид-мерки функционерите се луксузираат и одат на патувања.
Од Владата денеска за „360 степени“ потврдија дека вицепремиерот во претходните три работни дена бил на одмор, но не ја открија дестинацијата на која отпатувал, како што и не ги демантираат информациите дека бил во Дубаи.
„Заменикот на претседателот на Владата, задолжен за борба против корупцијата и криминалот, одржлив развој и човечки ресурси, Љупчо Николовски, согласно Законот за работни односи, од приватни причини, користеше одмор од 2020 година, во времетраење од три дена, заклучно со денешниот ден. Николовски од денеска им се враќа на своите работни обврски“,
информираат од кабинетот на Николовски.
И лично Николовски изјави за „360 степени“ дека користел три дена одмор за, како што вели, приватни потреби.
„Од денеска продолжувам со ангажманите и во Владата и во СДСМ“,
рече Николовски.