Министерот за правда Кренар Лога до Уставниот суд достави иницијативи за оценување на уставноста и законитоста на прописи донесени од институции кои не го испочитувале рокот за објава во „Службен весник“. Лога, лут на уставните судии кои минатата недела привремено го стопираа Упатството на министерството за правда со кое се означува и етничката припадност на изводот на родени, најави дека до Судот ќе достави десетици иницијативи.
„Со цел да се гарантира уставноста и законитоста на прописите во државата и за сите да важат уставните рокови за објавување во Службен весник,министерот за правда Кренар Лога денеска до Уставниот суд достави 10 иницијативи во име на Министерството за правда и 10 во свое лично име како граѓанин за поведување постапки за оценување на уставноста на прописи објавени во ’Службен весник’ спротивно на членот 52 од Уставот. На потег се почитуваните судии од Уставен суд од кои очекуваме да се произнесат за иницијативите со истата ефикасност, брзина и експедитивност како што постапија за Упатството за матичните книги на минатата отворена седница“
наведуваат од Министерството за правда.
Во иницијативите од Министерството за правда е наведено дека во изминатиот период воочена е објава на повеќе прописи за кои постои уставна обврска за објава во ,,Службен весник на Република Северна Македонија”, а кои се објавени во спротивност со членот 52, односно не е почитуван уставниот рок од седум дена за објавување на прописите. Од судот, Лога исто така бара по службена должност да ја испита уставноста на прописите за кои не е почитуван уставниот рок од седум дена за нивно објавување.
Уставниот суд по службена должност на седница на 5 јули донесе одлука со која привремено го стави надвор од употреба упатството на министерот за правда Кренар Лога со кое се издава извод на родени во кој има графа за етничка припадност. Основната причина за поведување на постапката е пречекорување на рокот за потпишување – од потпишување, до објава во „Службен весник“. Министерот за правда го потпишал упатството на 29 мај, а во „Службен весник“ е објавено на 15 јуни.
Уставните судии изразија сомнеж во уставноста на ова упатство и покренаа иницијатива за проверка на законитоста. Додека одлучат за упатството на министерот, ќе важи времената мерка, односно во изводите нема да се става графата за етничка припадност.
Досега во изводите имаше графа за државјанството, но не и графа за национална припадност, што предизвика реакции во јавноста.
Лога својата одлука ја аргументираше дека со вметнување на графата се зголемуваат правата на етничките заедници.
За дел од правните експерти, меѓу кои и поранешната министерка и универзитетска професорка Рената Дескоска, одлуката е незаконска. Етничката припадност, како што објасни таа, спаѓа во групата сензитивни податоци, кои подлежат на посебна заштита, согласно правилата за заштита на личните податоци. Етничката припадност се пишува во матичната книга, но не сè што е напишано во матичната книга треба да стои и во изводите, потенцираше Дескоска.