На средбата, која Лога ја имал со претставници од Банката за развој на Совет на Европа, било побарано во најкус можен рок да се преземат ефективни мерки за санирање на оштетувањата и штетите настанати во полуотвореното и отвореното одделение во казнено-поправната установа „Идризово“, проект кој се спроведува со кредит од Банката
Затворот во сараевската населба Илиџа, кој има капацитет за 300 затвореници и 50 места за притвор, треба да биде пример како треба да изгледа затвор кој е изграден според највисоки европски стандарди, вели министерот за правда Кренар Лога кој за време на неговата работа посета на Босна и Херцеговина бил и во овој затвор.
Затворот, како што информираат од Министерството за правда, располага со најсовремено опремени простории, спортски терени, работилници, храната се служи во ќелиите, а има и посебна просторија за молитви и практикување на религија. Со изградбата на затворот во БиХ, се додава во соопштението од Правда, намалена е пребукираноста во затворите.
Со цел да се преземат конкретни мерки и активности за подобрување на состојбата во казнено поправните установи во нашата држава, Лога остварил средба со вицегувернерот на Банката за развој на Совет на Европа, Томаш Бочек и Арно де Вердиер, кантри менаџер од Банката за развој на Советот на Европа. На средбата Лога бил информиран за Проектот за „Реконструкција на казнено-поправните установи во Република Северна Македонија“ кој се спроведува со кредит од Банката за развој на Советот на Европа.
Во соопштението испратено од Министерството за правда се вели дека од страна на претставниците на Банката било побарано во најкус можен рок да се преземат ефективни мерки за санирање на оштетувањата и штетите настанати во полуотвореното и отвореното одделение во казнено-поправната установа „Идризово“.
„Успешната реализација на Проектот претставува само една од основите за подобрување на целокупната состојба со условите во затворите, третманот и постапувањето со притворените и осудените лица како и постигнување на ресоцијализација на лицата кои издржувале казна затвор“,
велат од Правда.
Состојбата со македонските затвори и пренатрупаноста е потенцирана во многубројни меѓународни извештаи, меѓу другото, и од Советот на Европа. Министерството за правда со цел растоварување на затворите во земјава, подготви предлог-закон за амнестија кој се очекува да биде усвоен на наредната владина седница, а со кој се овозможува ослободување и намалување на затворските казни за лесни кривични дела.
Со законот се предлага целосно ослободување на лицата на кои им е изречена казна затвор до шест месеци, а за осудениците кои со правосилна пресуда се осудени на казна затвор поголема од шест месеци, се предлага ослободување од издржувањето на 30 отсто од целокупната казна.
Законот за амнестија, како што информираат од Правда, не се однесува на лицата кои се осудени на доживотен затвор, за кривично дело убиство, за кривични дела против изборите и гласањето, против половата слобода и половиот морал, против државата, против човечноста и меѓународното право.