Со оваа владина Уредба, освен лицата со попреченост, од партиципација за студирање се ослободуваат и лицата со статус на деца без родители и родителска грижа, невработените родители на деца и лицата со статус воени инвалиди
Според најновата владина Уредба, лицата со попреченост во земјава се ослободуваат од плаќање партиципација за студирање, со што, како што велат од Владата, на сите лица со попреченост запишани на прв, втор и трет циклус на студии на јавните високообразовни установи ќе се овозможи да бидат ослободени од партиципација.
Како што соопшти владината прес-служба, оваа уредба е на иницијатива на Националното координативно тело за спроведување на Конвенцијата на ООН за правата на лицата со попреченост.
„Оваа Уредба им овозможува на лицата со попреченост да ги остварат сопствените потенцијали и личен развој на еднаква основа со сите други граѓани да бидат вклучени во високообразовните процеси, а за образовните институции е поттик да ги приспособат условите и програмите за образование за овие наши сограѓани. На тој начин лицата со попреченост развиваат компетенции согласно сопствените преференции и стануваат конкурентни на пазарот на трудот“,
се вели во соопштението од Владата.
Со оваа Уредба, освен сите лица со попреченост, од партиципација за студирање се ослободуваат и лицата со статус на деца без родители и родителска грижа, невработените родители на деца и лицата со статус воени инвалиди.
с„За остварување на ова право, подносителот доставува барање со наод и мислење од Службата за функционална проценка на деца и млади при ЈЗУ Здравствен дом-Скопје по основите на Меѓународната класификација на функционалноста (МКФ), како нов модел произлезен од реформата што ја спроведе Националното координативно тело за спроведување на Конвенцијата на ООН за правата на лицата со попреченост, со која се исклучува досегашниот медицински модел на категоризирање наспроти проценка на функционалните можности и капацитети на лицата со попреченост“,
се посочува во владиното соопштение.
Од Владата потсетуваат дека согласно чл. 24 од Конвенцијата на ООН за правата на лицата со попреченост, сите лица со попреченост имаат право на образование без исклучување и дискриминација со цел за максимален развој на човековиот потенцијал.
До донесувањето на оваа Уредба, право на ослободување на партиципација имаа само некои категории на лица со попреченост што, како што се наведува, практично ги ставаше останатите во подредена позиција.
