Во последната изјава на самитот, светските лидери ја нагласија осудата на војната, и покрај поделбите во групата, која ја вклучува не само Русија, туку и земји како Кина и Индија, кои имаат значителни економски врски со Москва и кои директно не ја критикуваа војната
Членовите на Групата 20 водечки светски економии (Г-20) денеска го завршија самитот во Бали, Индонезија со декларација во која остро се осудува војната во Украина, предупредувајќи дека конфликтот ја влошува и онака кревката глобална економија.
Во последната изјава на самитот, светските лидери ја нагласија осудата на војната, и покрај поделбите во групата, која ја вклучува не само Русија, туку и земји како Кина и Индија, кои имаат значителни економски врски со Москва и кои директно не ја критикуваа војната.
„Мнозинството земји-членки силно ја осудија војната во Украина и нагласија дека таа предизвикува огромно човечко страдање и ги влошува постоечките слабости во глобалната економија“,
се вели во завршната изјава.
Употребата на зборот „повеќето членки“ беше значаен показател за поделеноста, како и признавањето дека „имаше различни ставови и различни оценки“, и дека Г20 „не е форум за решавање на безбедносните прашања“, наведуваат агенциите.
Говорејќи по затворањето на самитот, индонезискиот претседател и домаќин на Г-20, Јоко Видодо, на прес-конференција рече дека „светските лидери се согласиле за содржината на декларацијата, односно за осуда на војната во Украина“, која го нарушува нејзиниот територијален интегритет.
Сепак, некои од зборовите употребени во декларацијата укажуваат на несогласување меѓу членките во врска со прашањето околу Украина.
„Оваа војна предизвика огромно страдање и исто така и се закани на глобалната економија, која сè уште е ранлива на пандемијата, што исто така предизвика ризици за криза со храна и енергија, како и финансиска криза. Г20 разговараа за влијанието на војната на глобалната економија“,
рече Видодо.
Документот од 17 страници се толкува како голема победа за САД и нивните сојузници, кои се залагаа самитот да заврши со остра осуда на Русија.
Усвојувањето на заедничка декларација би барало нејзино прифаќање и од лидерите кои споделуваат блиски врски со рускиот претседател Владимир Путин , особено кинескиот претседател Си Ѓинпинг, кој прогласи пријателство „без граници“меѓу Кина и Русија неколку недели пред инвазијата, како и од индискиот премиер Нарендра Моди.
Иако Индија видно се дистанцира од Русија, помалку е јасно дали има промена во односот на Пекинг кон Москва.
Кинескиот лидер Си повика на прекин на огнот и се согласи да се спротивстави на употребата на нуклеарно оружје во серија билатерални состаноци со западните лидери на маргините на Г-20, но јавно не сигнализираше посветеност да го убеди својот „близок пријател“ Владимир Путин да стави крај на војната.