Коментирајќи го ставот на новиот премиер на Црна Гора, Дритан Абазовиќ кој ја поддржа иницијативата „Отворен Балкан“, владиниот портпарол Душко Арсовски истакна дека иницијативата има политика на постојано отворена врата за земјите од регионот и најави дека на Самитот на оваа иницијатива што ќе се одржи во јуни во земјава, ќе бидат поканети и лидерите на Црна Гора, Босна и Херцеговина и на Косово
Портпаролот на Владата, Душко Арсовски, коментирајќи го ставот на Владата во врска со поддржувањето на иницијативата „Отворен Балкан“ од страна на црногорскиот премиер Дритан Абазовиќ, рече дека ставот на Абазовиќ е за поздравување и почит, бидејќи „Отворен Балкан“, како што посочи Арсовски, носи само придобивки за народите од Западен Балкан и ги европеизира државите.
„Отворен Балкан“, истакна владиниот портпарол Арсовски, има политика на постојано отворена врата за земјите од регионот и најави дека на Самитот на оваа иницијатива што ќе се одржи во јуни во земјава, ќе бидат поканети и лидерите на Црна Гора, Босна и Херцеговина и на Косово.
Претходно, новиот премиер на Црна Гора, Дритан Абазовиќ изјави дека ја поддржува регионалната иницијатива „Отворен Балкан“, посочувајќи дека таа е создадена да опфати шест земји од Западен Балкан.
„’Отворен Балкан’ е направен за шест земји, не е направен за пет и пол земји или три и пол земји, туку за шест земји. Секој кој учествува се претставува себеси и својата земја“,
рече Абазовиќ во интервјуто.
Властите во Подгорица и Приштина претходно одбиваа да учествуваат во „Отворен Балкан“, додека во Босна и Херцеговина не беше постигнат консензус за приклучување кон иницијативата, која ги опфаќа Србија, Албанија и Северна Македонија.