Нискобуџетната авиокомпанија „Визер“ го коригира датумот до кога ќе трае суспензијата на летови од и до аеродромското во Скопје. Забраната ќе трае до 16 април, а не до 30 април, како што беше соопштено вчера. Ограничувањето е поради пролонгираните забрани за патување на сите летови од и до Северна Македонија.
„Визер“ информира дека патниците со резервирани билети погодени од овие суспендирани летови, кои ги направиле резервациите директно на wizzair.com или на мобилната апликација на авиокомпанијата, ќе бидат автоматски известени преку електронска порака. Сто и дваесет проценти од целата сума ќе биде автоматски префрлена на „виз-сметката“ на корисникот, и тие ќе можат да ги искористат во текот на наредните 24 месеци за купување на сите производи и услуги на компанијата.
Патниците, исто така, можат да одберат опција за враќање на парите – за која, како што се посочува, треба подолго време да се реализира. Тие што ќе се одлучат за оваа варијанта ќе бидат информирани за сите потребни чекори за трансфер на парите преку банка или преку картичка во посебна електронска порака. Во овој случај, патниците ќе можат да изберат 100 проценти поврат на сумата. Патниците кои направиле резервација преку туристички агенции – вклучувајќи ги и онлајн-туристичките агенции – треба да ја контактираат компанијата преку која ги купиле своите билети.