Претседателот на Асоцијацијата за цистична фиброза Фики Гаспар вели дека неофицијално, пациентите со оваа дијагноза можеби уште во петок би го добиле потребниот лек
Лекот „трикафта“ кој им е потребен на болните од цистична фиброза пристигнал во земјава на почетокот на неделава. Ова во изјава за МИА го соопшти претседателот на Асоцијацијата за цистична фиброза Фики Гаспар кој вели дека неофицијално, пациентите со оваа дијагноза можеби уште во петок би го добиле потребниот лек.
Во моментов, вели тој, лекот сè уште не е дистрибуиран во клиниките бидејќи останува да се завршат и последните административни процедури.
„Сега треба да поминат бирократските процедури – царина, одобрување, едно, друго. Но, најверојатно, иако неофицијално, веќе в петок можеби пациентите ќе бидат повикани за примање на самиот лек. До крајот на неделата би требало да стигне на клиниките“,
вели претседателот на Асоцијацијата за цистична фиброза во изјава за МИА.
Кон средината на минатиот месец, Агенцијата за лекови (МАЛМЕД) издаде одобрение за интервентниот увоз на лекот „трикафта“ наменет за осумте пациенти со цистична фиброза кои се во најкритична состојба.
Другите пациенти со оваа дијагноза, пак, потребната терапија ќе можат да ја добијат откако ќе се спроведат потребните законски измени кои на државата ќе ѝ овозможат лекот „трикафта“ да го набавува по пониска цена и директно од производителот.
Од Владата неодамна информираа дека се дефинирани предлог-законските измени кои на државата ќе ѝ овозможат олеснета набавка на лекови, меѓу кои и „трикафта“ за чија итна набавка изминатиов период во неколку наврати апелираа болните од цистична фиброза.
Доколку предложените законски измени бидат усвоени и од Собранието, државата ќе може во директни преговори со производителот на лекот да ја набавува потребната терапија за пациентите кои боледуваат од цистична фиброза, но и сите лекови од овој тип.