Полициските екипи денеска имаа полни раце работа бидејќи дојавите за наводно поставени бомби се однесуваа на голем број објекти, меѓу кои и претседателската резиденција вила „Водно“, како и десет училишта од кои девет во Скопје и едно во Прилеп
Лажни се сите денешни дојави за наводно поставени експлозивни направи, соопшти попладнево Министерството за внатрешни работи откако нивните тимови завршиле со сите потребни проверки.
„Министерството за внатрешни работи ја известува јавноста дека се направени сите потребни проверки во врска со денешните пријави по добиените пораки на електронски адреси со закана за наводно поставена експлозивна направа во институции, училишта, хотели и згради во Скопје и едно училиште во Прилеп, и утврдено е дека станува збор за лажни пријави“,
се наведува во соопштението.
Полициските екипи денеска имаа полни раце работа бидејќи дојавите за наводно поставени бомби се однесуваа на голем број објекти, меѓу кои и претседателската резиденција вила „Водно“.
Заканувачките пораки утринава пристигнаа на електронските адреси на повеќе медиуми, меѓу нив и „360 степени“, како и на мејлот на Министерството за внатрешни работи, но тоа не беше цел, односно не беше дел од списокот на објекти каде што наводно има поставени бомби.
„Нема да застанеме додека корумпираната власт на СДСМ не се тргне. Властите веќе ЗНААТ што треба да прават, но тоа не го прават. Писмото беше пратено одамна. Затоа денес жртви МОРА да паднат“, .
беше наведено во заканувачката порака што пристигна на електронската адреса на „360 степени“.
Како локации каде што има поставен експлозив беа наведени Музејот на град Скопје, Природонаучниот музеј, Археолошкиот музеј, Музејот на македонската борба, Спомен-куќата „Мајка Тереза“, Градскиот трговски центар, трговскиот центар „Ист гејт мол“, Трговскиот центар „Бисер“, зградата „Флетирон“, зградите на „Џевахир“, Управениот суд, претседателската резиденција – вила „Водно“, хотелот „Мериот“, хотелот „Александар палас“, Спортскиот центар „Борис Трајковски“, Железничка станица Скопје и Фудбалската федерација на Македонија (ФФМ).
Подоцна во текот на денот, како што екипите на МВР ги завршуваа проверките на објектите, од Министерството информираа дека дојави за бомби имало и во девет скопски и едно училиште во Прилеп.