Според Агенцијата за пошти, на ваквите е-продавници најчесто се нудат текстил, обувки, електронски апарати, козметички и хигиенски производи, како и детски играчки
Лажни електронски продавници се појавуваат на електронскиот пазар, особено на социјалните мрежи, алармира Агенцијата за пошти и апелира граѓаните да внимаваат кога купуваат производи преку интернет. Поради состојбата со коронавирус велат зголемени се нарачките и доставите до дома, но и ризикот од измами.
Затоа Агенцијата посочува неколку препораки како да безбедно да се купува преку интернет.
„Пред да започнете со процесот на е-купување, задолжително да се направи проверка на онлајн продавницата од која сакате да пазарите. Не секој поединец или фирма, што се претставуваат дека се онлајн продавници се веродостојни продавници. Знаеме дека секој поединец може брзо и едноставно да креира лажен профил на некои од социјалните мрежи (Фејсбук, Инстаграм итн.) и да нуди продажба на производи и со помош на курирска достава да ги доставува до вратата на купувачот“,
стои во соопштението.
Според сознанијата на Агенцијата за пошти, на ваквите е-продавници најчесто се нудат текстил, обувки, електронски апарати, козметички и хигиенски производи, како и детски играчки.
Од таму советуваат и дека веб-продавниците кои се рекламираат дека вршат продажба на различни производи и услуги, треба да се проверат дали навистина постојат како официјално регистрирани трговци во Централниот регистар или Управата за јавни приходи.
За да се поедностави процесот доволно е да се побараат информации за компанијата која стои зад електронската продавница, односно адреса на компанијата и евентуална локација, контактни податоци – како телефонски број, активна е-адреса и сл.
Друг начин за проверка за сигурноста на е-продавниците е поседувањето дигитален сертификат, односно дали во пребарувачот на почетокот од лентата за линкот постои зелен катанец, кој означува дека конекцијата е безбедна.
При проверка на валидноста на е-продавниците треба да се внимава и на сомнителни „скокачки прозорци“, односно дали се наоѓате на истата веб-страница од каде што излегол прозорецот и да се обрне внимание на рекламните банери, кои пренасочуваат на друга веб-страница или, пак, на страници кои имитираат други со цел да соберат лични податоци и приватни информации.
„Без разлика кој начин на плаќање ќе го одбере купувачот, по приемот, во случај содржината на пратката да не соодветствува со производот/производите што се нарачани, одговорноста паѓа на страната на продавачот, т. е. на е-продавницата“,
нагласува Агенцијата за пошти.
Од Агенцијата за пошто во повеќе наврати укажува дека поштенските оператори не одговараат за содржината на пратката. Тие можат да преземат одговорност само за губење или целосно оштетување на пратката, за делумно оштетување или нејзино ограбување или, пак, за пречекорување на рокот за достава.